Poland Open. Olimpiada licenziantlari shohsupada. Jalgasbay chempion, Mo'minjon va Elmuratda bronza!

Poland Open reyting turnirida dunyoning ko'zga ko'ringan, aksari Tokio Olimpiadasiga yo'llanma qo'lga kiritgan erkin, yunon-rum va ayollar kurashi vakillari ishtirok etyapti. Ular orasida yurtimiz sharafini yunon-rum kurashchilarimiz himoya qilishmoqda. 

Quvonarlisi, yunon-rum kurashi musobaqasining birinchi kuni terma jamoamiz azolari 1 ta oltin, 2 ta bronza medalini qo'lga kiritishdi. Ularning uchchalasi Tokio Olimpiadasi licenzianti ekani diqqatga sazovor. 82 kg vazn toifasida gilamga chiqqan Jalgasbay Berdimuratov barcha raqiblarini engib, Poland Open chempioniga aylandi. Qoraqalpog'istonlik kurashchimiz nimchorak finalda polshalik Ivan Nilipyuk (11-3), chorak finalda estoniyalik Ranet Kaljola (2-0), yarim finalda shveciyalik Aleks Kessidisni (5-1) hisobida mag'lubiyatga uchratdi. Oltin medal uchun kechgan bellashuvda esa ukrainalik Yaroslav Filchakovdan ustun keldi. 

67 kg vazn toifasida yurtimiz sharafini himoya qilgan ikki kurashchimiz Mahmud Baxshilloev va Elmurat Tasmuradov bronza medali uchun kechgan bahsda o'zaro to'qnash kelishdi. Tajriba bobida ustunroq bo'lgan Rio Olimpiadasining bronza medali sovrindori, besh karra Osiyo chempioni, Tokio Olimpiadasi licenzianti hisoblangan Tasmuradov o'zbek derbisida g'alaba qozonib, bronza medalini qo'lga kiritdi. Terma jamoamizga ikkinchi bronza medalini 130 kg vazn toifasidagi polvonimiz Mo'minjon Abdullaev taqdim etdi. Tokio Olimpiadasi licenzianti bronza uchun kechgan bellashuvda chililik Yasmani Akosta Fernandesni mag'lubiyatga uchratdi.