Polvonlarimiz jahon chempionatida 11 ta medal qo'lga kiritishdi, hozircha FOTOGALEREYA

Mazkur jahon chempionatiga puxta hozirlik ko'rgan belbog'li kurash bo'yicha erkaklar va ayollardan iborat terma jamoamiz (bosh murabbiy Azamjon SHokirjonov) ham munosib ishtirok etishmoqda.

Jahon chempionatida erkaklar belbog'li kurashning erkin yo'nalishida 8 ta vazn toifasida, xotin-qizlar esa 5 ta vaznda gilamga chiqishmoqda.  

Quvonarlisi, 35 davlatdan yig'ilgan eng sara sportchilar orasida polvonlarimiz 3 ta oltin, 4 ta kumush, 4 ta bronza medallarini qo'lga kiritishga muvaffaq bo'lib, kuchlilar qatoridan joy olishdi.

Kechagi erkin yo'nalish bo'yicha bellashuvlarda terma jamoamiz tarkibidan joy olgan sportchilardan 57 kg. vazn toifasida Oybekjon Hamidov (Namangan), 68 kg.da Oybek Sultonov (Andijon), 52 kg.da Farangiz Abdunabieva (Sirdaryo)lar barcha raqiblarini engib, oltin medallarni qo'lga kiritishdi.

82 kg.da Husniddin Ro'ziev (Andijon), 100 kg.da Azamjon Anvarjonov (Andijon), +100 kg.da SHerzod Rahimov (Farg'ona), 58 kg.da Manzuraoy Mo'ydinova (Farg'ona) kumush medallariga ega chiqishgan bo'lsa, 62 kg.da Murodjon Rahimov (Xorazm), 52 kg.da Madina Akramova (Andijon), 66 kg.da Zemfira Azatova (Qoraqalpog'iston), +76 kg.da Anife Kurtseitova (Andijon)lar uchinchi o'rinni band etib, bronza medal sohiblariga aylanishdi.

Birinchi kungi bellashuvlar yakuniga etgach, tantanali tarzdagi taqdirlash marosimi bo'lib o'tdi. G'olib va sovrindorlar medal, diplom, kubok va esdalik sovg'alari bilan taqdirlanishdi.

Jahon chempionati davom etmoqda.

Bugun polvonlarimiz belbog'li kurashning klassik yo'nalishida bellashishadi. Ularga ushbu yo'nalishda ham omad yor bo'lsin, deymiz!  

Ilhom RAHMONOV tayyorladi, o'z muxbirimiz