31 okt 18:02
Yangiliklar

Og'ir atletika

Qamashi tuman hokimi chempionlarni 5 mln so'm pul mukofoti bilan taqdirladi

So'nggi yillarda Qamashi tumanida bir qator sport inshootlarining foydalanishga topshirilishi yoshlarni sportga bo'lgan ishtiyoqini yanada oshirmoqda.

Milliy kurash, karate, og'ir atletika, boks, voleybol, dzyudo, futbol va boshqa sport turlaridan tuman yoshlari viloyat, respublika va jahon miqyosida o'tkazilayotgan musobaqalarda munosib ishtirok etmoqda.

Xususan, og'ir atletika sport turida yoshlarimizning erishayotgan natijalari quvonarli. 2019 yilning mart oyida AQSH da bo'lib o'tgan o'smirlar va qizlar o'rtasidagi og'ir atletika bo'yicha jahon chempionati milliy terma jamoa uchun muvaffaqiyatli o'tgani bilan esda qoldi. Vakillarimiz jami 16 ta medal jamg'arishdi.

Jahon chempionatida qamashilik Nigora Abdullaeva 3 ta oltin medalni qo'lga kiritgan bo'lsa, Tursunoy Jabborova 1 ta oltin va 2 ta kumush medallarni o'ziniki qilib olgandi.

SHuningdek, yaqinda Koreya Xalq Demokratik Respublikasining Pxenyan shahrida og'ir atletika bo'yicha o'smirlar va yoshlar o'rtasida Osiyo chempionatida ishtirok etib kelgan sportchilarimiz yuqori natijalarni qayd etishdi. O'z vazn toifasida T. Jabborova tengsiz bo'lgan bo'lsa, N.Abdullaeva kumush medalni qo'lga kiritdilar. Albatta, bularning barchasi quvonarli natijalar.

Jahon va Osiyo chempionatlarida ko'rsatilgan ushbu natijalar qizlarimizga Olimpiada yo'llanmasi uchun muhim reyting ochkolarini keltirgani sportchi qizlarimiz oldiga yanada yuksak marralarni qo'ymoqda.

Qamashi tuman hokimligida Tokio olimpiadasiga yo'llanma olishda yaxshi imkoniyatlarga ega bo'lgan sportchilar T.Jabborova va N.Abdullaeva va yosh sportchilar bilan tuman hokimi SHerali Sanaev uchrashuvi bo'lib o'tdi. Uchrashuvda tuman hokimi yoshlarga chidamli va sabrli bo'lish kerakligi to'g'risida gapirdi. Yurtimizda sportga qaratilayotgan etibordan unumli foydalanish zarurligini ham aytib o'tdi.

Jahon va Osiyo chempionatlari sovrindorlari Nigora Abdullaeva va Tursunoy Jabborovaga tuman hokimligi tomonidan 5 million so'mlik mukofot pullari berildi.

- Har bir inson yurakdan mehnat qilsa albatta, o'z o'ylagan natijasiga erishadi, - deydi jahon chempioni Tursunoy Jabborova. 5 million so'm pul mukofoti va tuman hokimimizning ishonchlari uchun tashakkur aytaman. Asosiy maqsadim bo'lgan olimpiada yo'llanmasini qo'lga kiritish uchun tinimsiz mehnat qilaman.