Qashqadaryo va Surxondaryo polvonlari kurash seminarida qatnashishdi

Qarshi shahrida “Kurash Olimpiada sari, gender tenglik" mavzusida o'tgan seminar treningga nafaqat viloyatdagi mutaxassis va ishqibozlar, balki qo'shni Surxondaryo viloyati vakillari ham jalb etildi.

Ikki viloyat kurash mutaxassislari ishtirokidagi seminarda milliy sportimiz kurash bo'yicha amalga oshirilayotgan ishlar, uning texnik va taktik tamoyillari, musobaqalar jarayonidagi vaziyatlar, o'quv-mashg'ulotlarni tashkil etishda kurash qoidalariga, milliy ananalarga amal qilish jihatlari keng muhokama qilindi. Faxriy polvonlar Abdurashid Mirzaev, Oston CHo'liev, Olim Xayitov, jahon chempioni Baxrom Avazov, O'zbekiston kurash federaciyasi bosh kotibi Alisher Eshonqulov seminar tinglovchilarining savollariga javob berishdi. Ekspertlarning fikr-mulohazalari tinglandi.

Muhimi, Qashqadaryo va Surxondaryo viloyatlari o'rtasida kurashning ommalashtirish, musobaqalar tashkil etish, hamkorlik qamrovini davlatimiz rahbari tomonidan imzolangan «Mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari to'g'risida»gi qaror asosida ham kengaytirish bo'yicha kelishuvga erishildi.

Seminar har tomonlama ishchan ruhda o'tdi. Uning yakunida ishtirokchilarga kurash tarixi, uning sport qonun-qoidasi muallifi Komil Yusupov haqidagi vedio lavhalar namoyish etildi. 

“Kurash Olimpiada sari, gender tenglik" mavzusidagi seminar-treningda faollik ko'rsatgan yoshlar tashkilotchilar tomonidan diplom va sovg'alar bilan taqdirlandi.

To'lqin Ro'ziev.