Qashqadaryoning "yashil" toifasiga kiruvchi hududlarida sport qayta jonlantirildi

Yurtimizga koronavirus pandemiyasi kirib kelishi va tarqalishining oldini olish bo'yicha Respublika maxsus komissiyasining 2020 yil 29 maydagi qaroriga asosan 2020 yil 1 iyundan «yashil» hududlarda sport sekciyalari, to'garaklari, sport zallari va fitnes klublar, 5 iyundan esa basseynlar, yani suzish havzalari faoliyatiga ham ruxsat berildi.

Jumladan, Qashqadaryo viloyatining "yashil" toifasiga kiruvchi hududlaridagi sport sekciyalari, to'garaklari, sport zallari va fitnes klublari karantin qoidalariga qatiy rioya qilgan holda o'z faoliyatini yo'lga qo'ymoqda.

Sport inshootlari, shu jumladan, ochiq maydonlarning kirish-chiqish joylarida fuqarolarning tana haroratini pirometrlarda o'lchash, 37°S va undan yuqori tana harorati bo'lgan fuqarolarni sport inshootlariga kiritmaslik va bu haqida sog'liqni saqlash bo'limlariga xabar berish, sport tadbirlari hamda badantarbiya mashg'ulotlari soat 07:30 dan 18:30 gacha bo'lgan vaqt oralig'ida tashkil etilishiga qatiy amal qilinmoqda.

SHu bilan birga, sport inshootlarida mashg'ulotlar boshlanishi oldidan va kun davomida bir necha marotaba dizenfikciya ishlari amalga oshirilyapti. Sportchilar ham niqoblarda bo'lishi va mashg'ulotlarda ijtimoiy masofaga amal qilinishi qatiy nazorat qilinmoqda. Bundan ko'zlangan asosiy maqsad, sportchilar va trenerlar salomatligini asrashdan iborat.