Qilichbozlarimiz Jahon kubogi bosqichlarida g'olib va sovrindor bo'lishdi

Ahamiyatlisi, unda ishtirok etayotgan o'zbekistonlik "mushketyor"lar sovrinli o'rinlarni egallashmoqda.

Jumladan, Bolgariyaning Plovdiv shahrida o'tkazilayotgan turnirda sablyachimiz Zuhriddin Qodirov yakkalik dasturida kumush medalni qo'lga kiritdi. U finalda amerikalik Morril Uilyamga 15:11 hisobida mag'lub bo'lgan.

Qizlar o'rtasidagi yakkalik bahslarida esa Samira SHokirova bronza medaliga ega chiqdi. U yarim final bosqichida franciyalik Tori Toskanga imkoniyatni boy bergan - 14:15.

Quvonarlisi, Plovdivdagi sablya turnirida qizlarimiz jamoaviy dasturda birinchi, yigitlarimiz esa uchinchi o'rinni egallashdi.

Fernarda Errera, Gulistan Perdebaeva, Nargiza Jaksibaeva hamda Samira SHokirovadan iborat qizlar terma jamoamiz finalda Franciya ustidan 45:43 hisobida g'alaba qozondi.

Yigitlar terma jamoamiz esa bronza medali uchun kechgan bahsda Vengriyani 45:39 hisobida dog'da qoldirdi. Turnirda termamiz tarkibida Islombek Abdazov, Sardor Abdukarimbekov, Azizbek Dauletnazarov hamda Zuhriddin Qodirov harakat qildi.

Bundan tashqari, Xorvatiyaning Zagreb shahrida o'tkazilgan rapira yo'nalishidagi turnirda yigitlar terma jamoamiz jamoaviy dasturda uchinchi o'rinni egalladi. Termamiz yarim final bellashuvida Italiyaga mag'lub bo'lgan. Jamoa tarkibida esa Fozilxo'ja Alimov, Ilyosbek Maripjonov, Radmir Semeneev va Ulug'bek Usmonov ishtirok etdi.