Qishki olimpiadada qatnashgan Komiljon To'xtaev O'zbekistonga qaytib keldi + FOTO

To'rt yillikning nufuzli musobaqasida O'zbekiston sharafini himoya qilgan, vatanimiz bayrog'ini oq olimpiada uzra xilpiratgan Komiljon To'xtaev va yurtimiz sport delegaciyasi azolarini Islom Karimov nomidagi Toshkent xalqaro aeroportida vazir o'rinbosari SHaxrullla Mahmudov, Milliy olimpiya qo'mitasi mutaxassislari, murabbiy va sportchilar, keng jamoatchilik vakillari hozir bo'lishdi.

Takidlash lozim, bu galgi 24-qishki olimpiya o'yinlari har jihatdan murakkab sharoitda o'tkazilmoqda. Unda dunyoning ko'pgina davlatlari sportchilari olimpiya yo'llanmalari hamda zarur reyting ochkolariga ega bo'lolmaganligi sababli qatnasha olmadi. Bu esa Pekin-2022 da o'sha mamlakatlarning bayrog'i kutarilmaslikka olib keldi.

Dunyodagi epidemiologik vaziyatning “sovuq shamoli”ga qaramasdan davlatimiz tomonidan qishki olimpiya o'yinlarining saralash va tayyorgarlik bosqichlarida qatnashishi kutilgan sportchilarga etarli shart-sharoit yaratildi. Buning natijasida kutilgan 3-4 ta olimpiya yo'llanmasidan bittasiga erishildi. Tog' chang'ichimiz Komiljon To'xtaev Evropa va Osiyo qitasidagi musobaqalardagi reyting ochkolari natijasida Pekin-2022 yo'llanmasini qo'lga kiritdi.

Garchi hamyurtimiz Pekin-2022da tog' chang'isining gigant slalom  bahslarida sovrinli o'rinni egallamagan bo'lsa-da, u oq olimpiadada 90 nafarga yaqin ishtirokchi orasida 29-o'rindan joy olishi va bu ko'rsatkich uni Osiyo sportchilari orasida birinchiligini taminlaganligi bilan ahamiyatli bo'ldi. 

"Pekin olimpiadasida yuksak natijalarni ko'zlagandim. Bu sport. Unda hamma narsa bo'lishi mumkin. Masalan, men qatnashgan gigant slalom bahslarida 87 nafar sportchi qatnashgan bo'lsa, ularning 30 nafardan oshig'i ilk bellashuvdayoq bahsni tark etdi. Bu safargi olimpiada men uchun ikkinchisi bo'ldi. Asta-sekin mahoratim oshib bormoqda. Bilasiz, olimpiada katta tajribaga ega bo'lganlar bahsi. Bunday deyishimga sabab, ko'pgina yo'nalishlarni kuzatgan bo'lsangiz, qatnashchi va sovrindor bo'lganlarning aksariyati uchun ushbu olimpiada to'rtinchi yoki beshinchisidir. SHunday ekan, ruhiyatimni tushurganim yo'q. Men uchun eng quvonchli voqea - olimpiya o'yinlarining ochilish marosimida Prezidentimiz SHavkat Mirziyoevning bevosita qatnashib, biz maydonda Vatanimiz bayrog'ini olib o'tganimizda qo'llab turganligi hayotimdagi unutilmas onlar bo'ldi. Kelajakda albatta, olimpiya chempioni bo'lishga harakat qilaman", -dedi kutib olish marosimida Komiljon To'xtaev.

Eslatib o'tamiz, Pekin olimpiadasidagi ishtirokini yakunlagan hamyurtimiz Komiljon To'xtaev endi fevral oyining so'nggi kunlarida Livanda o'tadigan qita chempioatida qatanashishi rejalashtirilmoqda.

To'lqin Ro'ziev

Tadbirdan olingan suratlarni tomosha qiling.