Qo'qon shahrida Prezident topshirig'iga ko'ra qurilgan basseyn foydalanishga topshirildi

Kuni kecha Yurtboshimiz tashabbusi bilan boshlangan yana bir savobli ish nihoyasiga etkazildi.
 

Jismoniy tarbiya va sportni rivojlantirish jamg'armasi tomonidan barpo qilingan hududdagi o'ninchi obektning ochilish marosimida jismoniy tarbiya va sport vaziri D.Nabiev, davlat va jamoat tashkilotlari vakillari, sportchilar, yoshlar, jurnalistlar ishtirok etdi.
 

Ushbu yopiq suv havzasini qurish uchun jamg'arma mablag'lari hisobidan 4.5 milliard so'm ajratildi. Obektda 11x25 metr o'lchamdagi suzish havzasi, murabbiylar, shug'ullanuvchilar uchun yuvinish, kiyinish, dam olish, tibbiyot xonalari, suvning tarkibi, sifati nazorat qilinadigan laboratoriya hamda tomoshabinlar uchun o'rindiqlar mavjud.
 

Qo'qon shahridagi 1-sonli bolalar-o'smirlar sport maktabi qoshidagi ushbu inshootda bir kunda 120 nafar o'g'il-qiz suzish sporti sirlarini o'rganishi uchun sharoit yaratilgan. Etiborlisi, bolalar va o'smirlar sport maktabiga jamg'arma tomonidan 200 million so'mlik jihozlar ham topshirildi.

O'zbekiston Respublikasi Vazirlar Mahkamasining 2018 yil 2 iyundagi tegishli qarori asosida Jismoniy tarbiya va sportni rivojlantirish jamg'armasi mablag'lari hisobidan barpo etiladigan sport inshootlari manzilli dasturiga Farg'ona viloyatidagi 10 ta obekt kiritilgandi. Ushbu hujjat asosida Beshariq, Uchko'prik, Rishton, Oltiariq, Farg'ona, Quva, Toshloq tumanlaridagi BO'SMlar maydoni va Marg'ilon shahridagi “Atlaschi” stadioni rekonstrukciya qilindi. SHuningdek, Qo'qon shahridagi 2-BO'SM suzish havzasi kapital tamirlandi.

Malumot o'rnida keltirib o'tish joiz, 2018 yil dasturiga asosan, Jismoniy tarbiya va sportni rivojlantirish jamg'armasi tomonidan shu paytga qadar yopiq suv havzasi bo'lmagan hududlarda jami 9 ta zamonaviy basseyn qurildi.