Qorako'lda zamonaviy kurash markazi ish boshladi

Yurtimiz va jahon maydonlarida o'tkazilayotgan nufuzli xalqaro musobaqalarda qorako'llik polvonlarning yuksak cho'qqilarni zabt etayotgani ham bunga yorqin misol bo'ladi. Qorako'l kurash maktabi erishgan muvaffaqiyatlarda Qoraun qishlog'idan etishib chiqqan polvonlarning munosib hissasi bor.

Ushbu qishloqni bejiz “polvonlar qishlog'i” deb atashmaydi. Qoraundan etishib chiqqan polvonlar sharafiga endilikda mahalla nomi ham rasman “Polvonlar mahallasi” nomi bilan yuritilmoqda.

Mamlakatimizda O'zbekiston Respublikasi davlat mustaqilligining yigirma sakkiz yilligi keng nishonlanayotgan shu kunlarda mazkur mahallada yoshlarimizga o'zbek kurashi sir-asrorlarini o'rgatadigan “Kurash markazi” foydalanishga topshirildi.

Markazda yoshlar uchun kurashdan tashqari sportning tennis, stol tennisi, shaxmat-shashka, voleybol, mini futbol turlari bilan ham bemalol shug'ullanishi uchun imkoniyatlar yaratilgan.

SHuningdek markazda Kurash tarixi muzeyi, 50 o'rinli yotoqxona, oshxona, zamon talablari asosida jihozlangan o'quv xonalari, trenajyor zali ham kurash ixlosmandlari uchun xizmat qiladi.