Qozog'iston terma jamoasining Tokio Olimpiadasidagi bayroqdorlari malum + FOTO

Etiborlisi, Qozog'iston tarixida ilk bor to'rt yillikning eng nufuzli musobaqasi tantanali ochilish marosimida odatdagidek bir emas, ikki nafar sportchi mamlakat bayrog'ini ko'tarish baxtiga muyassar bo'ladi. 

Qozog'iston davlat bayrog'i boks bo'yicha mamlakat terma jamoasi sardori, Bahodir Jalolovning asosiy raqiblaridan biri Kamshibek Kunkabaev hamda engil atletika bo'yicha Olimpiada chempioni va sovrindori Olga Ripakovaga ishonib topshirildi.   

Bu Olga Ripakova uchun faoliyatidagi to'rtinchi Olimpiada bo'ladi. U London-2012 Olimpiadasida oltin medalni qo'lga kiritgan. 2008 yil Pekin Olimpiadasida uchxatlab sakrash bahslarida kumush, Rio-2016 olimpiya o'yinlarida esa bronza medaliga ega chiqqan. 

Kamshibek Kunkabaev – boks bo'yicha Qozog'iston terma jamoasi sardori. U harbiylar o'rtasida 2014 yilgi jahon chempioni chempioni, 2017 va 2019 yillarda o'tkazilgan Osiyo va jahon chempionatlarining kumush medali sovrindori hisoblanadi. Har ikki musobaqaning finalida hamyurtimiz Bahodir Jalolovga yutqazgan. Qizilo'rdalik 29 yashar bokschi ilk bor Olimpiadada ishtirok etadi. 

Eslatib o'tamiz, Tokio-2020 Olimpiadasining tantanali ochilish marosimi 23 iyul kuni bo'lib o'tadi. Qozog'iston terma jamoasi 16 iyul kuni Kunchiqar yurtga jo'nab ketadi va ikki haftalik karantinda bo'ladi. Sportchilarning salomatligi va xavfsizligini taminlash maqsadida delegaciya «Air Astana» kompaniyasining charter reysi bilan Tokioga yo'l oladi.