Rahimova Miami Open asosiy to'r ilk davrasida dunyoning 63-raketkasini osonlikcha mag'lub etdi

Musobaqaning saralash bahslari final uchrashuvida mamlakatimizning birinchi raketkasi Kamilla Rahimova dunyoning 68-raketkasi, avstraliyalik 21 yoshli Talia Gibsonga 3/6, 4/6 hisobida imkoniyatni boy berib qo'ygandi. Qizig'i, vakilamiz saralash bahslarining "laki-luzer", yani omadsiz omadlisi sifatida asosiy to'rga qo'yildi. 

Bugun tong saharda Rahimova 1/64 final bosqich uchrashuvida argentinalik Solana Sierraga qarshi kortga chiqdi. Ellik sakkiz daqiqa davom etgan bahsda tennischimiz dunyoning 63-raketkasiga hech qanday imkoniyat qoldirmadi - 6/1, 6/3. Kamilla 1, Solana 3 ta eys zarbasini amalga oshirdi. Qo'shxatolar Rahimovada ko'proq bo'ldi - 4 ga 3.     

Taqqoslash uchun, Kamilla Rahimova ayni paytda WTA reytingida 82, Sierra 63-o'rinni egallab turibdi. Bu tennischilarning o'zaro o'tkazgan ikkinchi uchrashuvi bo'ldi - 2:0. SHu yilning 13 fevral kuni Dubayda o'tkazilgan turnirning saralash bahslarida ham Rahimova Solanani mag'lubiyatga uchratgan edi. 

Endi Kamilla Rahimova 1/32 finalda dunyoning 28-raketkasi, ukrainalik Marta Kostyukka qarshi kortga chiqadi. Marta to'g'ridan-to'g'ri ikkinchi bosqichdan o'z ishtirokini boshlaydi. Bu uchrashuv bugun bizning vaqt bilan soat 01:00da boshlanadi. Bu tennischilarning o'zaro o'tkazadigan ikkinchi uchrashuvi bo'ladi. Bundan besh yil avval Istanbulda o'tgan turnirda Kostyuk Rahimovani 6/4, 6/3 hisobida taslim etgan edi.