Ramziddin Saidovni tabriklaymiz!

Ramziddin Saidov - 1982 yilning 14 aprel kuni Buxoroda dunyoga kelgan. Dzyudo sir-asrorlarini O'zbekiston Respublikasida xizmat ko'rsatgan murabbiy, "El-yurt hurmati" ordeni sohibi, Olot dzyudo maktabi asoschisi Rustam To'raevdan o'rgangan.  

2012 yilgi London Olimpiadasida ishtirok etgan Saidovga bronza medalini qo'lga kiritishi uchun bir qadam etmay qolgandi. -100 kg vazn toifasida tatamiga chiqqan Ramziddin AQSH vakili Vashkulat Kil, kubalik Oreydi Despenni mag'lubiyatga uchratdi. CHorak finalda mo'g'ulistonlik Tuvshinbayar Naydanga imkoniyatni boy berib qo'ydi. 

Bronza medali yo'lidagi ilk bellashuvda ozarbayjonlik Elmar Gasimovdan ustun keldi. Ammo, hal qiluvchi bahsda germaniyalik Dimitr Petersga yutqazib qo'ygan va Olimpiadani kuchli beshlikda yakunlagan edi. Sportda g'alaba va mag'lubiyat yonma-yon yuradi deb shunga aytishsa kerak-da! 

Bugungi qahramonimiz 2004 yilgi Afina Olimpiadasida ham ishtirok etgandi. Xuddi shu yili Qozog'istonda o'tkazilgan Osiyo chempionatida -81 kg vazn toifasida ishtirok etib, oltin medalni qo'lga kiritgan. 2006 yilda Dohadagi Osiyo o'yinlarida -90 kg vaznda qatnashib, bronza medaliga sazovor bo'lgan.  

Ramziddin Saidov 2013 yilda -100 kg vazn toifasi reytingida 1-o'ringa ko'tarilgan. 2010 yilda Abu-Dabi Gran-Pri, Toshkentda o'tgan Jahon kubogi, 2012 yilda Moskva "Katta Dubulg'a" turnirlarida shoxsupaning eng yuqori pog'onasiga ko'tarilgan. 

SHundan so'ng uning murabbiylikdagi faoliyati boshlangan. Hozirda Saidov IJF referisi hisoblanadi va Tokio-2020 Olimpiadasida hakamlik qilishga bosh davogar bo'lib turibdi.

Fursatdan foydalanib, Ramziddin Saidovni bugungi unutilmas kuni - tavallud ayyomi bilan O'zbekiston dzyudo federaciyasi rahbariyati, murabbiylar shtabi va dzyudochilar nomidan muborakbod etamiz.