Rasman: Kattalar o'rtasida kurash vazn toifalari 16 taga etkazildi!

Avvalroq, erkaklar 7 ta va ayollar 8 ta vazn toifasida bellashgan bo'lsa, endi erkaklar uchun yangi – 120 kg vazn toifasi joriy etildi.

Bu o'zgarish xalqaro nufuzli sport musobaqalarida Kurashning ishtirokini mustahkamlash maqsadida amalga oshirildi. Xususan, 2024 yil davomida AIMS (Alliance of Independent Recognized Members of Sport) tashkilotiga azolik jarayonlarida vazn toifalarini maqbullashtirish masalasi bir necha bor muhokama qilindi. Tahlillar natijasida vazn toifalarini tenglashtirish tavsiya etildi.

2024 yil 13 aprel kuni bo'lib o'tgan IKA Boshqaruv kengashi yig'ilishida bu masala atroflicha ko'rib chiqildi va erkaklar uchun 120 kg vazn toifasini qo'shish bo'yicha yakuniy qaror qabul qilindi.

— Biz 8 oy davomida barcha texnik va taktik jihatlarni chuqur o'rgandik, — deydi IKA Bosh kotibi Muhammad Reza Nassiriy. — Kurashni xalqaro standartlarga moslashtirish uchun vazn toifalarini qisqartirish emas, balki yangi vazn qo'shish eng to'g'ri qaror bo'ldi. Bu boshqa kurashchilar uchun ham yangi imkoniyatlar yaratadi.

Kattalar o'rtasida Kurash vazn toifalari quyidagicha belgilandi:

Erkaklar: -60 kg, -66 kg, -73 kg, -81 kg, -90 kg, -100 kg, -120 kg, +120 kg.

Ayollar: Oldingi tartib saqlab qolindi.

Yangi vazn toifasi 2025 yilda IKA tomonidan tashkil etiladigan barcha rasmiy musobaqalarda amalga joriy qilinadi.