Rasman: Xalqaro Olimpiya qo'mitasi Xalqaro sambo federaciyasini doimiy ravishda tan olganini malum qildi

Bugun Yaponiyada o'tkazilgan XOQ sessiyasida bu qaror rasman elon qilindi.

Bu haqida Xalqaro sambo federaciyasi prezidenti Vasiliy SHestakov shunday deydi:

"Bugun sambo oilasi uchun haqiqiy bayram. Uch yil oldin FIAS XOQ tomonidan vaqtinchalik tan olingandi. Bu vaqt oralig'ida biz butun jahon uchun bundanda yaxshirog'iga loyiq ekanligimizni isbotladik. Ushbu davr dunyodagi og'ir vaziyatga - Covid-19 pandemiyasiga to'g'ri keldi hamda hayotimizning barcha sohalariga, shu jumladan sport tadbirlarini tashkil etish va o'tkazishga ham tasir ko'rsatdi. Ammo biz inqiroz sharoitida ishlashni, ko'plab cheklovlarga moslashishni, g'ayrioddiy sharoitlarda xalqaro turnirlarni o'tkazishni o'rgandik. Dastlab, ushbu vazifa imkonsiz bo'lib tuyuldi, shunga qaramay, birgalikdagi say-harakatlar bilan biz bunga erishdik. Bu, asosan, milliy va qita sambo federaciyalarining yaxshi muvofiqlashtirilgan ishi va albatta, bizning bosh hamkorlarimiz - "Rosneft"ning ko'magi tufayli amalga oshdi.

Endilikda yanada ko'proq davlatlar bizning sportimizga o'z eshiklarni ochmoqdalar, Sambo musobaqalarini dunyoning 68 mamlakati telekompaniyalari, shu jumladan sport translyaciyasining bayroqdori - "Eurosport" telekanali translyaciya qilmoqda. Samboning taniqli vakillari nomlari esa butun dunyoga malum. 

Xalqaro olimpiya qo'mitasidan bizning ishimizni qadrlagani va sportimizga ko'rsatayotgan etibori uchun minnatdormiz. Bugun biz azaliy orzuimiz - samboni Olimpiya o'yinlari dasturiga qo'shish yo'lida yana bir katta qadam tashladik. Ushbu tarixiy voqea bilan butun dunyodagi sambochilarni tabriklayman!", - dedi SHestakov.