Rim WTA 1000. Dunyoning birinchi raketkasi bosh sovrinni ko'zlayapti

Sayyoramizning birinchi raqamli tennis malikasi Arina Sobolenko to'rtinchi davrada WTA reytingida 27-o'rinni egallab turgan ukrainalik Marta Kostyukni 6/1, 7/6(8) hisobida mag'lubiyatga uchratdi. Tennischilarning o'zaro uchrashuvlaridagi hisob yanada yiriklashdi - 4:0. 

Ikki soatu olti daqiqa davom etgan bahsda Sobolenko 4, Kostyuk 2 ta eys zarbasini amalga oshirgan. Qo'shxatolar Martada ko'proq bo'ldi 5 ga 2, breyklar bo'yicha esa tabiiyki, Arina ustunlik qildi - 4 ga 2. Belaruslik tennischi bu yilgi mavsumda o'zi qatnashgan turnirlarda ketma-ket beshinchi marotaba 1/4 finalda o'ynaydi. Uning bu bosqichdagi raqibasi dunyoning ettinchi raketkasi, xitoylik CHjen Cinven bo'ladi.