Rio-2016. Hasanboy Do'stmatovning bugungi final oldidan fikrlari

Bugun -49 kg vazn toifasidagi hamyurtimiz hal qiluvchi final jangida ringga ko'tariladi. Uning raqibi kolumbiyalik Yurberxen Martines bo'ladi. Martines jiddiy raqib. Yarim finalda u kubalik bokschini mag'lubiyatga uchratib, buni amalda isbotladi. 

SHunday bo'lsada, oltin medalga barcha yurtdoshlarimiz qatori biz ham umid bog'layapmiz. Final jangi oldidan biz Hasanboy Do'smatovdan intervyu oldik. 

- Hasanboy, g'alaba muborak bo'lsin. Avvalo, yarim final jangi haqidagi fikrlaringiz bilan o'rtoqlashsangiz. 

- Tabrik uchun rahmat. O'z o'rnida men ham uzoq masofadan biz sportchilarni g'oyibona qo'llab-quvvatlayotgan hamyurtlarimizga minnatdorchilik bildiraman. Ularning ishonchlarini oqlashga astoydil harakat qilamiz. Endi bevosita jangga kelsam, uning qiyin kechishini bilardim. Amalda ham shunday bo'ldi. Dastlabki ikki raundni o'z foydamga hal qilganimni bilganim uchun ham uchinchi raundda kuchimni finalga tejashga harakat qildim. Buning natijasida hotirjamlik ham yuzaga keldi, bo'shashdim. SHunday bo'lsada, raqibimni mag'lubiyatga uchratib, finalga yo'l oldim. 

- Amerikalik raqibingiz bilan ilk marotaba to'qnash keldingizmi?

- Ha, avval uchrashmagandim. Uni shu Rioda o'tkazgan avvalgi janglari orqali o'rgandik. Murabbiylarimiz bilan birga shunga yarasha jangga taktika tayyorlagandik. Natijasi esa yomon bo'lmadi. 

- Ikkinchi yarim final jangini bevosita arenadan kuzatdingizmi?

- Albatta. Finaldagi raqibim kim bo'lishini kuzatib bordim. Men kubalik bokschi g'alaba qozonadi deb o'ylagandim. Biroz kutilmagan natija bo'ldi men uchun. Endi finalda kimga qarshi jang o'tkazishning unchalik ahamiyati yo'q. Finaldagi raqiblar hamisha jiddiy bo'lgan. Yaxshi tomoni shundaki, kolumbiyalik raqibim mening jang uslubimga mos tushar ekan. SHundan xursandman. O'ylaymanki, chiroyli g'alabam bilan hamyurtlarimizni xushnud etaman. O'zbekiston terma jamoasiga ilk oltin medalni taqdim etishga astoydil harakat qilaman. Bundan 16 yil avval Muhammadqodir aka Abdullaev bokschida chempion bo'lgandilar. O'sha oltin medal yagona bo'lib kelyapti. Men ham Muhammadqodir akan singari chempion bo'lishni istayman. Mening g'alabam qolgan bokschilarimizni ham ruhlantirishi aniq.      

Kamoliddin Alimov suhbatlashdi