Ruslan Nuriddinov: "Eng ko'p maoshni futbolchilar oladi. Ularga yana nima kerak?"

Olimpiada rekordchisi bilan suhbatimiz bir soatcha davom etdi. Keyin jarayon dastxat ulashish va fotosessiyaga ulanib ketdi. Suhbat turli mavzularda bo'lib, ularning eng qiziqarlilarini etiboringizga havola qilib boramiz. Dastlab, futbol mavzusi...

- Men shuni aniq bilamanki, Angliya klublarida umumjismoniy tayyorgarlik bo'yicha alohida mashg'ulot o'tkaziladi, - deb so'z boshladi sportimiz iftixori. – Futbolchilar majburiy ravishda trenajer zalida ishlashadi va murabbiylar bu jarayonga jiddiy tarzda etibor qaratishadi. Bilishimcha, klublarimizning hammasida ham bunday emas ekan. Xatto ayrim grand klublarimizda umumjismoniy tayyorgarlik futbolchilar uchun ixtiyoriy ravishda berilgan. 

Trenajer zalidagi har bir mashg'ulot futbolchining malum bir mushaklarini rivojlantirish uchun mo'ljallangan bo'ladi. Tez yugurish uchun oyoq mushaklari baquvvat bo'lishi shart. Bizning futbolchilar nima uchun uzog'i bilan 60 daqiqadan so'ng charchab qolyapti? Sababi, oyoqda kuch yo'q. Tomir tortishlar ham shundan. Zarbalarni ham ko'ryapsiz qanday holda berilmoqda. Faqat kross yugurish bilan futbolchi mukammallikka erishmaydi.

Yaqinda saytingizda Ruslan CHagaev mehmon bo'lganida Germaniyaning “SHalke-04” klubiga master klass, yani mahorat sabog'i o'tkazgani haqida o'qidim. Juda qiziq loyiha. Agar menga oliy liga jamoalarimiz shunday taklif bilan chiqishsa, bunga rozi bo'larmidim? Menimcha, bu qo'limdan kelmaydi. CHunki, men futbolga qiziqmayman. SHuning uchun, bu yo'nalishda maxsus mutaxassisning ishlagani maqul.

Bilasizmi, eng ko'p maoshni aynan futbolchilar olishadi. Ularga yana nima kerak? Lekin natija yo'q. Balki, futbolchilar bilan ham xuddi bizda bo'lgani kabi munosabatda ishlash kerakdir. Yani, oldin natija, keyin pul. Tasavvur qiling, O'zbekiston chempioni bo'lgan futbolchiga mashina berilyapti. O'x-xo', agar og'ir atletikada ham shunday bo'lsa, mening mashinalarim soni qanchaga etardi? Masalan, menga jahon chempioni bo'lganimdan keyin mashina berishgan. 

Endi etibor bering, futbolchilarimiz jahon chempioni bo'lishdi. Ularga mars sayyorasini sovg'a qilisharkan-da! Bu narsaning amalga oshmasligi aniq. CHunki, biz hali jahon chempionati yo'llanmasini qo'lga kirita olmayapmiz. Men shunchaki taqqoslash uchun bu misolni aytdim.