Saida Mahmudova terma jamoa azolarini shug'ullantirdi

Har qanday sharoitda ham xohish bo'lsa, jismoniy tarbiya va sport bilan shug'ullanishning imkoni bor. Bu esa ayni damda hukm surayotgan karantin davrida ham sportchilarimizning bo'sh vaqtlarini mazmunli o'tkazish, uy sharoitida bo'lsa-da, sport bilan shug'ullanishlari uchun juda muhimdir.

Jumladan, Saida Mahmudova boshchiligida o'tgan stol tennisi bo'yicha mashg'ulotlar, tennischilarning jismoniy holatini yaxshilash va texnikalarini yanada oshirishga katta hissa qo'shdi. Jismoniy tarbiya va sport vazirligi hamda Milliy olimpiya qo'mitasi tavsiyasi bilan onlayn tarzda o'tgan mashqlarni stol tennischilar qunt bilan o'zlashtirdi. Mashg'ulotlar davomida tajribali murabbiya shogirdlariga kerakli tavsiyalari berib bordi.

– Doimo sport bilan shug'ullanish nafaqat professional sportchilarni balki, har bir insonni ruhan tetik, jismonan baquvvat qiladi. Ayniqsa, bugungi kunda ko'pchilik insonlar uy sharoitida qolmoqda. Bu esa kam harakatlik sabab yuzaga keladigan ortiqcha vazn to'planishi, yurak va qon tizimidagi kasalliklar, nafas olish kabi muammolarni keltirib chiqaradi. SHu sababli ham, biz doimo onlayn mashg'ulotlarni o'tkazib kelmoqdamiz. Mashg'ulotlar davomida sportchilarga nafaqat o'zlari, balki, yon-atrofdagi yaqin insonlarini sport va jismoniy tarbiya bilan shug'ullanishlariga undamoqdamiz, – deydi S.Mahmudova. – Professional tennischilarimiz haqida to'xtaladigan bo'lsam, eng avvalo ularning ruhiy holatini bir maromda ushlab turishlari uchun, federaciyamiz ruhshunosi tomonidan haftada ikki marotaba psixologik treninglar o'tkazilayotgan bo'lsa, shifokorimiz har kuni ularning salomatliklarini nazorat qilib bormoqda. SHuningdek, har bir yosh toifasidagi terma jamoalarimiz murabbiylari tomonidan oldinda turgan musobaqalarga bosqichma-bosqich tayyorlamoqda. Biz barcha sharoitga tayyor turishimiz kerak. Umid qilamizki, tez orada pandemiya ham tugaydi va barchamiz sport musobaqalarda ishtirok etamiz. Bu uchun men va shogirdlarim doimo tayyor.

O'zbekiston stol tennisi federaciyasi matbuot xizmati