SHahrullo Mahmudov: “Argentinada medallar uchun kurashamiz”

Har to'rt yilda tashkil etiladigan ushbu nufuzli musobaqada vatanimiz sharafini bu safar 37 nafar sportchimiz himoya qilishidan xabaringiz bor. SHundan uch nafari og'ir atletika sporti vakillaridir.

2014 yili Xitoyning Nankin shahri mezbonlik qilgan II yozgi o'smirlar Olimpiya o'yinlarida og'ir atletikachilarimiz ham terma jamoamiz muvaffaqiyatlariga munosib ulush qo'shishgandi. O'shanda Farhod Sobirov kumush, Adhamjon Ergashev esa bronza medaliga sazovor bo'lishgan. Quvonarlisi, bugungi kunda ushbu sportchilarimiz asosiy terma jamoamiz safidan mustahkam joy olishgan va hozirda joriy yil noyabr oyida Turkmanistonda o'tkaziladigan navbatdagi jahon chempionati musobaqalariga qizg'in tayyorgarlik ko'rishmoqda. Yurtimizda esa ularga munosib o'rinbosarlar etishib chiqayapti. SHu bois bu safar ham mutaxassislar og'ir atletikachilarimizdan yuksak natijalar kutishmoqda. 

– Argentinada o'tkaziladigan III yozgi o'smirlar Olimpiya o'yinlarida terma jamoamiz safida uch nafar atletimiz supachaga chiqishadi, – dedi biz bilan suhbatda O'zbekiston og'ir atletika federaciyasi raisining birinchi o'rinbosari, Osiyo og'ir atletika federaciyasi vice-prezidenti SHahrullo Mahmudov. – O'smirlar o'rtasida -77 kg. vazn toifasida Muhammadqodir Toshtemirov, qizlardan esa -63 kg. vazn toifasida Kumush Fayzullaeva hamda -90 kg. vaznli atletlar orasidagi bahslarda ishtirok etadigan Dalera Fayzullaeva III yozgi o'smirlar Olimpiya o'yinlariga yo'llanmalarni Taylandda o'tkazilgan yoshlar o'rtasidagi jahon chempionatida qo'lga kiritishgan edi. Bugungi kunda sportchilarimiz muntazam tayyorgarlik jarayonini olib borishmoqda va umid qilamizki ular Argentinadagi musobaqaga o'zlarining optimal holatida etib borishadi. Bizning atletlar bilan bir vazn toifalaridagi jahonning etakchi sportchilari tomonidan yil davomida qayd etilgan natijalarga qarab xulosa chiqaradigan bo'lsak, vakillarimizning har birida III yozgi o'smirlar Olimpiya o'yinlarida sovrindorlar safidan joy olish, hatto chempion bo'lish uchun ham imkoniyatlar etarli. Kezi kelganda takidlash joiz, yozgi o'smirlar Olimpiya o'yinlari biz uchun muhim musobaqalardan sanaladi. Bundan to'rt yil muqaddam Nankinda o'tkazilgan musobaqada qatnashgan atletlarimiz bugun kattalar o'rtasida ham o'z so'zlarini aytishmoqda. Ishonamanki, Argentinada bo'ladigan III yozgi o'smirlar Olimpiya o'yinlarida ham biz yaqin zahiramizni ko'zdan kechirib olamiz va kelgusida ular ham akalari singari jahon arenalarida vatanimiz sharafini munosib himoya qilishadi. 

Otabek Eshmamatov, jurnalist