SHaxmat Olimpiadasi. 22-raqamli jamoamiz 22-o'rinni egalladi

42-Butunjahon shaxmat Olimpiadasida O'zbekiston ayollar va erkaklar terma jamoalari ham ishtirok etdi. Kecha musobaqada so'nggi 11-tur uchrashuvlari o'tkazildi. O'zbekiston ayollar terma jamoasi har ikki yilda bir marotaba o'tkaziladigan nufuzli musobaqani g'alaba bilan yakunladi.

Slovakiya terma jamoasiga qarshi kechgan bahsda hamyurtlarimiz 3,5:0,5 hisobida zafar quchishdi. Nafisa Mo'minova birinchi doskada raqibasi Eva Repkova bilan durang o'ynadi. Qolgan shaxmatchilarimiz Gulruhbegim Tohirjonova, Irina Gevornyan va Sarvinoz Qurbonboevalar raqibalarini mag'lub etishning uddasidan chiqishdi.

Taqqoslash uchun, shaxmat Olimpiadasida Slovakiya 37, O'zbekiston esa 22-raqamli jamoa sifatida qayd etilgandi. Ushbu g'alabadan so'ng terma jamoamiz 31-pog'onadan 22-o'ringa ko'tarilib oldi va aynan shu natija bilan shaxmat Olimpiadasini yakunladi.

Terma jamoamiz 11ta uchrashuvdan 6tasida zafar quchib, 2ta bahsda durang o'ynagan va uch bor mag'lubiyat alamini totib ko'rgan. Xitoy terma jamoasi Olimpiada chempioniga aylandi. Polsha kumush, Ukraina esa bronza medaliga sazovor bo'ldi.