SHaxmat Olimpiadasi. Erkaklar jamoamiz 39-o'rin bilan kifoyalandi

42-Butunjahon shaxmat Olimpiadasida 17-jahon chempioni Rustam Qosimjonov boshchiligidagi O'zbekiston erkaklar terma jamoasi nisbatan past natija ko'rsatdi. Olimpiadaning so'nggi 11-turida shaxmatchilarimiz Belarus terma jamoasiga 1:3 hisobida imkoniyatni boy berishdi.

Rustam Qosimjonov birinchi doskada qora donalarda harakat qilib, Sergey Jigalko bilan durang o'ynadi. Anton Filippov Andrey Jigalko bilan bahsda murosaga keldi. Afsuski, Jahongir Vohidov va Marat Jumaevlar reytingda o'zlaridan yuqorida turuvchi raqiblariga yutqazib qo'yishdi.

Taqqoslash uchun, Belarus terma jamoasi Olimpiadada 23, O'zbekiston terma jamoasi esa 31-raqam ostida tasniflangan edi. Yakunda terma jamoamiz 39-pog'ona bilan kifoyalandi. Vaholanki, so'nggi tur oldidan jamoamiz 23-o'rinni egallab turgandi. Terma jamoamiz 6ta g'alaba, bitta durang va 4ta mag'lubiyat bilan Olimpiadani yakunladi. AQSH terma jamoasi Olimpiada chempioniga aylandi.