SHaxmat Olimpiadasi. Erkaklar jamoamiz Germaniyani mag'lub etdi

42-Butunjahon shaxmat Olimpiadasida O'zbekiston ayollar va erkaklar terma jamoalari ham ishtirok etyapti. O'n ettinchi jahon chempioni Rustam Qosimjonov boshchiligidagi O'zbekiston erkaklar terma jamoasi Olimpiadaning 10-turida kuchli hisoblangan Germaniya terma jamoasini 2,5:1,5 hisobida mag'lub etishning uddasidan chiqdi.

Rustam Qosimjonov birinchi doskada Germaniyaning birinchi raqamli grossmeysteri Liviu-Deter Nisipiyanu bilan durang o'ynadi. Jahongir Vohidov reytingda o'zidan yuqorida turuvchi Mattias Blubaumga yutqazib qo'ydi. Ularning baxtiga Anton Filippov va Marat Jumaev o'zlaridan ancha kuchli raqiblarni mag'lub etib, terma jamoamizga muhim g'alabani keltirishdi.

Taqqoslash uchun, Germaniya terma jamoasi Olimpiadada 13, O'zbekiston terma jamoasi esa 31-raqam ostida tasniflangan. Bugun shaxmatchilarimiz 11-turda Belarus terma jamoasi vakillariga qarshi dona suraishadi. O'ninchi turdan so'ng terma jamoamiz qo'shimcha ko'rsatkichlarga ko'ra 36-pog'onadan 23-o'ringa ko'tarilib oldi. Terma jamoamiz hisobida 6ta g'alaba, bitta durang va 3ta mag'lubiyat bor.