SHaxmat Olimpiadasi. Qizlarimiz Germaniya bilan durang o'ynashdi

42-Butunjahon shaxmat Olimpiadasida O'zbekiston ayollar va erkaklar terma jamoalari ham ishtirok etyapti. Kecha musobaqada 7-tur uchrashuvlari o'tkazildi. O'zbekiston ayollar terma jamoasi ketma-ket ikkita g'alabadan so'ng durang natija qayd etdi.  

Germaniya terma jamoasiga qarshi kechgan bahsda Nafisa Mo'minova va Sarvinoz Qurbonboeva o'zlaridan reytingda yuqorida turgan raqibalarini mag'lubiyatga uchratishdi. Irina Gevorgyan va Gulruhbegim Tohirjonova esa aksincha imkoniyatni boy berishdi.

Taqqoslash uchun, shaxmat Olimpiadasida Germaniya 10, O'zbekiston 22-raqamli jamoa sifatida qayd etilgan. Ushbu durangdan so'ng terma jamoamiz 16-o'rinni egallab turibdi. Terma jamoamiz 7ta uchrashuvdan 4tasida zafar quchib, 2ta durang o'ynagan va bir bor mag'lubiyatga uchragan. Bugun shaxmatchi qizlarimiz dunyoning beshinchi raqamli jamoasi bo'lib turgan Hindiston terma jamoasidagi dugonalariga qarshi dona surishadi.