SHaxmat Olimpiadasi. Qizlarimiz Sloveniyadan ustun kelishdi

42-Butunjahon shaxmat Olimpiadasida O'zbekiston ayollar va erkaklar terma jamoalari ham ishtirok etyapti. Kecha musobaqada 6-tur uchrashuvlari o'tkazildi. O'zbekiston ayollar terma jamoasi ketma-ket ikkinchi g'alabani tantana qilishdi.

Bu safar Sloveniya terma jamoasi shaxmatchilari 2,5:1,5 hisobida mag'lub etildi. Nafisa Mo'minova Laura Unuk bilan durang o'ynadi. Irina Gevorgyan raqibasiga yutqazib qo'ydi. Uning baxtiga Gulruhbegim Tohirjonova va Sarvinoz Qurbonboevalar o'z partiyalarida g'alabaga erishib, terma jamoamiz muhim g'alabani taqdim etishdi.  

Ushbu g'alabadan so'ng terma jamoamiz qo'shimcha ko'rsatkichlarga ko'ra 23-o'rindan 16-o'ringa ko'tarilib oldi. O'ninchi o'rindagi Gruziya terma jamoasida ham shuncha ochko bor. Terma jamoamiz 6ta uchrashuvdan 4tasida zafar quchib, bittadan durang va mag'lubiyat qayd etgan. Bugun shaxmatchi qizlarimiz o'zlari singari ochkoga ega bo'lib turgan Germaniya terma jamoasiga qarshi dona surishadi.