SHerali Jo'raev tojik kurashida "Kobalt" mashinasiga ega chiqdi

Gushtingi tojik milliy kurashi hisoblanadi. Dushanbe shahridagi "Navro'zgo'x" stadionida bo'lib o'tgan musobaqada erkaklar -60 kg, -70 kg, -80 kg, -90 kg, +90 kg, ayollar esa -52 kg, -70 kg, -87 kg vazn toifalarida gilamga chiqishdi.

Quvonarlisi, uch kurashchimiz musobaqa g'olibi, yana uch nafari sovrindorlar safidan joy oldi. Erkaklar o'rtasidagi g'oliblarga "Kobalt" avtomobillari topshirildi. SHerali Jo'raev +90 kg vazn toifasida tojikistonlik taniqli dzyudochi Temur Rahimovni mag'lubiyatga uchratib, ana shu avtoulovlarning biriga ega chiqdi. 

Ikkinchi o'rin egalari 38,6 ming somoniy (taxminan 3,5 ming dollar), uchinchi o'rin soxiblari esa 12,8 ming somoniy (taxminan 1,2 ming dollar) miqdorida pul mukofoti bilan taqdirlanishdi. -80 kg vaznda kurashgan Umar Bozorov finaoda tojikistonlik SHodmon Rizoevga, -90 kg vazndagi Erkin Qozoqov esa yana bir taniqli dzyudochi Komronshoh Ustopiriyonga imkoniyatni boy berib, ikkinchi o'rinni band etishdi.  

Ayollar vazn toifasida g'olib bo'lgan sportchilarga 38,6 ming somoniy (3,5 ming dollar), ikkinchi o'rin uchun – 25,7 ming somoniy (2,2 ming dollar), bronza medali sohiblariga 12,8 ming somoniy (1,2 ming dollar) mukofot puli berildi. 

Ayollar o'rtasidagi gushtingi kurashida hamyurtlarimizdan Ravzaxon Adasheva (-70 kg) va Pokizaxon Kamoliddinova (-87 kg) chempionlik shohsupasiga ko'tarilishdi. Dillola Dehqonboeva (-52 kg) esa uchinchi o'rinni egalladi.