Sportga yo'naltirilgan 1 so'm 7 so'm foyda keltiradi

SHu maqsadda poytaxtimizdagi "Milliy" stadionda Jismoniy tarbiya va sport vazirligi mutasaddilari bilan Toshkent shahri yoshlari o'rtasida uchrashuv tashkil etildi.

Ushbu uchrashuvda vazir o'rinbosari Elbek SHukurov hamda Toshkent shahar Jismoniy tarbiya va sport boshqarmasi boshlig'i Akromxo'ja SHodixo'jaevlar yoshlarni qiziqtirgan savollarga javob berishdi.

— Hozir tilimizda "uyushmagan yoshlar" degan ibora paydo bo'ldi. Menga qolsa yoshlarga nisbatan bu tarifni ishlatmagan bo'lardim. Siz hozir kelajak ostonasida turibsiz. Har birimiz bu bosqichdan o'tganmiz. Kelajagini qurish yo'lida izlanayotgan, harakat qilayotgan va intilayotgan yoshlarni «uyushmagan», deb atamagan bo'lardim, - dedi yoshlar bilan uchrashuvda vazir o'rinbosari Elbek Habibullaevich SHukurov.

"Yaqinda Finlyandiyadagi talim tizimini o'rganish asnosida Islandiyaning yaqin tarixi bilan ham tanishib chiqdim. Malum bo'lishicha, 1992-94 yillarda bu mamlakatda 12 yoshli bolalarning 85 foizi spirtli ichimliklar istemol qilar ekan. Tasavvur qilyapsizmi? Mayli, pivoga o'xshash engil ichimlik bo'lsin, ammo baribir yosh bolalarning spirtli ichimlikka ruju qo'yishi dahshatku! 

Islandiya bu illatdan qutulish uchun talim va sportga etiborni kuchaytirdi. Natijada oradan 20 yil o'tib eng sog'lom millatlardan biriga aylandi. Uzoqqa bormaylik, futbol bo'yicha so'nggi Evropa va Jahon chempionatlarida Islandiya terma jamoasi qanaqa shov-shuv ko'targaniga hammamiz guvohi bo'ldik. Statistikaga etibor bersak, sportga sarflangan 1 so'm pul davlatga 7 so'm foyda olib keladi. 

Qanday qilib deysizmi? Agar bir xodim kasal bo'lsa, unga davlat hisobidan davolanish puli to'lab beriladi. U xodim yana shifoxonada davolanadigan bo'lsa, uning sog'ligini tiklashi ham davlat hisobidan amalga oshiriladi. Qolaversa, ish unumdorligi pasayadi. Agar o'sha xodim sog'lom bo'lsa, yuqoridagi sarf-xarajatlarga zarurat qolmaydi, ish unumdorligi yuqori bo'ladi. Bu iqtisodiyotga ham foyda keltiradi. SHuningdek, uning baxtlilik indeksi yuqori bo'ladi", deb aytib o'tdi vazir o'rinbosari.

Uchrashuvda Toshkent shahridagi mahallalarda istiqomat qiluvchi qariyb yuz nafar yoshlar o'zlarini qiziqtirgan savollar bilan mutasaddilarga murojaat qildi. Jumladan, Mirzo Ulug'bek tumani "Yuzrabot" mahallasida istiqomat qiluvchi Jahongir ismli o'smir ilgari uyi oldida oddiy turnik va brus bo'lgani, yoshlar unda mashq qilishib o'z sog'ligini tiklashgani, ammo aytarli jiddiy sababsiz ular buzib tashlangani va endi yoshlar bo'sh vaqtini qanday o'tkazishni bilmay qiynalayotganini aytib,bu borada vazirlik rahbariyatidan amaliy yordam so'radi.

— Albatta bunday muammolar yo'q emas, deylik Toshkent shahrida so'nggi 2-3 yilda qanchadan qancha yangi uylar barpo etildi. Biroq, aholining farzandlari uchun oddiy bog'cha yoki maktab inobatga olinmagan. Endi biz shunday loyihani ilgari suryapmiz va bu taklif hukumatimiz tomonidan ham maqullandi. Bundan keyin yangi qurilayotgan uylar oldida albatta aholi uchun velosayr va piyoda yurish uchun yo'lakchalar inobatga olinadi, - dedi vazir o'rinbosari E.SHukurov.

Tadbir davomida yoshlarning bir qator muammolari hal qilindi va ularni qiynayotgan savollarga javob olishdi. SHuningdek, tadbir davomida Toshkent shahridagi barcha BO'SMlar ishtirokida maxsus ko'rgazmali burchak tashkil etildi.

SHu erning o'zidayoq poytaxtimizda istiqomat qiluvchi yoshlar o'zlari qiziqqan sport turi bo'yicha BO'SMlarda tashkil etilgan sport to'garaklariga azo bo'lish imkoniyati yaratildi.