Sultonov bu hafta Kalaburagida o'z imkoniyatini sinovdan o'tkazadi

Mukofot jamg'armasi 25 000 AQSH dollarini tashkil qiluvchi turnirda hamyurtimiz Humoyun Sultonov ham o'z mahoratini namoyish etadi. Mamlakatimizning birinchi raketkasi M25 toifasiga kiruvchi ushbu turnirda ham birinchi raqam ostida saralangan. 

Qura natijasiga ko'ra, Sultonov ilk davra uchrashuvida hindistonlik Vishu Vardanga qarshi kortga chiqadi. Bu bahs ertaga, 20 noyabr kuni bizning vaqt bilan soat 09:30da boshlanadi. Agar Humoyun Vishuning to'sig'idan o'tib olsa, uni 1/8 finalda yana bir hind tennischisi Srinivasan Kodancha qarshi oladi. 

Taqqoslash uchun, Sultonov ATP reytingida 230, Vardan 1165, Srinivisan esa 1781-pog'onadan joy olgan. Bugun Humoyun musobaqaning juftliklar bahsidagi ishtirokini boshlaydi. U ilk davrada germaniyalik Lukas Deliano bilan birga hindistonlik tennischilarga qarshi kortga chiqadi.

Yana bir malumot, asosiy to'rda 7 nafar xorijlik tennischilar bo'lib, qolganlari mezbonlar hisoblanadi.