Sultonov "CHellenjer" turnirini qiyin g'alaba bilan boshladi

Hamyurtimiz Italiyaning Barletta shahrida o'tkazilayotgan turnirda ishtirok etmoqda. Ushbu "CHellenjer" turkumiga kiruvchi musobaqaning mukofot jamg'armasi 91 250 evroni tashkil qiladi. Turnirda 8-raqam ostida tasniflangan Humoyun ilk davrada ukrainalik Oleksandr Ovcharenkoga qarshi kortga chiqdi. 

Ikki soatu 27 daqiqa davom etgan uch setlik murakkab bahsda Sultonov raqibini kambek evaziga mag'lubiyatga uchrata oldi - 2/6, 7/6(3), 7/5. Humoyun uchrashuv davomida 3, Oleksandr 6 ta eys zarbasini amalga oshirgan. Qo'shxatolar hamyurtimizda ko'proq bo'ldi - 4 ga 3. Bu tennischilarning o'zaro o'tkazgan ilk uchrashuvi edi.    

Taqqoslash uchun, Sultonov ATP reytingida 229, Ovcharenko esa 327-o'rinni egallab turibdi. Endi tennischimiz 1/8 finalda xorvatiyalik Matey Dodigga qarshi kortga chiqadi. Ushbu bahs bizning vaqt bilan ertaga, 3 aprel kuni soat 13:00da boshlanadi.