Tasdiqlandi: Lazizbek Mullojonov doping sabab 3 yilga diskvalifikaciya qilindi

SHu yilning 11 iyun kuni musobaqadan tashqari o'tkazilgan doping nazorati chog'ida o'zbekistonlik bokschi Lazizbek Mullojonovdan olingan namunada metasteron moddasi - anabolik-androgenik steroid aniqlangandi. 

O'sha paytda unga dastlab, vaqtinchalik chetlatish jazosi qo'llanilgandi. 

Xalqaro test agentligining (ITA) malum qilishicha, Mullojonov o'ziga nisbatan 3 yillik diskvalifikaciya jazosi qo'llanilishiga rozi bo'lgan. Qayd etilishicha, Lazizbek antidoping qoidalarini (ADRV) buzgani bo'yicha qarorga etiroz bildirmagani orqali 4 yil emas, balki 3 yilga diskvalifikaciya qilingan. Hamyurtimizning havaskor boksdagi diskvalifikaciya muddati 2025 yil 22 iyuldan 2028 yil 21 iyulgacha amal qiladi. 

Bu holatda shu narsa oydinlashyaptiki, Los-Anjeles-2028 Olimpiadasi bokschimizning "ro'yxati"dan o'chiriladi. Uning 2025 yil 11 iyundan 22 iyulga qadar havaskor boksda qayd etgan barcha natijalari bekor qilinadi.

Qizig'i, Lazizbek Mullojonov bugun Toshkentdagi prof boks oqshomida ringga ko'tariladi.