Termizda Prezident sovrini uchun kurash musobaqasi o'tkaziladi

1993 yildan buyon har ikki yilda o'tkazib kelinayotgan turnirda shu kunga qadar dunyoning eng nomdor polvonlari ishtirok etishgan.

Bu safargi musobaqada hozircha 30ga yaqin davlatdan 50 nafardan ortiq polvonlar ishtirok etish istagini bildirishgan.

Xalqaro turnirda erkaklar -60, -66, -73, -81, -90 kg., ayollar esa -48, -57, -63, -70, +70 kg. vazn toifalarida o'zaro bellashadi. SHuningdek, musobaqada mutlaq vazn toifasida ham bellashuvlar tashkil etiladi.

Al-Hakim At-Termiziy Xalqaro turnirining umumiy mukofot jamg'armasi 100 ming dollarini tashkil etib, har bir vazn toifasida g'oliblarga 3 000 AQSH dollari, 2-o'rinlar uchun 2 000 AQSH dollari hamda ikkita 3-o'rin sohiblari 1 000 AQSH dollari miqdoridagi pul mukofotini qo'lga kiritishadi.

Mutlaq vaznda g'olib bo'lgan polvon O'zbekiston Respublikasi Prezidenti sovrini – 10 000 AQSH dollariga sazovor bo'ladi. 2-o'rin sohibi 5 000 dollar, ikkita 3-o'rin sohiblari 3 500 dollardan, jami 22 000 dollar miqdoridagi pul mukofoti bilan taqdirlanishadi. Mutlaq vazn toifasidagi 4 nafar chorak final omadsizlarining har biriga esa 2 000 dollardan jami 8 000 dollar pul mukofoti tasis etilgan.

XV bor tashkil etilayotgan ushbu musobaqa ham har doimgidek qiziqarli, murosasiz va kuchli raqobat ostida o'tishiga shubha yo'q.