Toshkent og'ir atletika bo'yicha jahon chempionatiga tayyor

Mazkur yirik sport anjumaniga er yuzining 50 ga yaqin davlatidan 350 dan ziyod sportchi va murabbiylar, mutaxassislar tashrif buyurmoqda.

Malumki, O'zbekiston nufuzli sport musobaqalarini o'tkazish bo'yicha katta tajribaga ega. Bunday salohiyatga o'z-o'zidan erishilmagan, albatta. Mamlakatimizda jismoniy tarbiya va sportni rivojlantirishga Davlat miqyosida ahamiyat berilishi, natijada yigit-qizlarimizning ko'plab sport turlari bo'yicha jahon miqyosida zalvorli yutuqlarni qo'lga kiritishi dunyo ahli etiborini Vatanimizga qaratdi. Jumladan, og'ir atletikachilarimiz ham keyingi yillarda nafaqat Osiyo, balki jahonning etakchi davlari qatoridan haqli ravishda o'rin egalladi. 

SHu bois, endilikda ushbu sport turi bo'yicha eng yirik musobaqalarni o'tkazish mamlakatimizga topshirilishi odatiy holga aylandi. Respublikamiz Osiyo musobaqalarini juda ko'p marta qabul qilgan. 2013 yil Toshkentda II o'smirlar Olimpiya o'yinlariga yo'llanma beruvchi 17 yoshgacha bo'lgan atletlar o'rtasidagi jahon chempionati katta muvaffaqiyat bilan o'tkazilgan. 

Mana endi navbatdagi yosh toifasi – 20 yoshgacha bo'lgan sportchilar o'rtasidagi jahon chempionatini o'tkazish huquqi O'zbekistonga berildi. Aniqrog'i, bu huquq shunchaki berilmasligi kundek ravshan. Mamlakatimizdagi siyosiy barqarorlik, tinchlik-xotirjamlik, jismoniy tarbiya va sportga qaratilayotgan alohida etibor, sportchi va murabbiylarimizning yuqori natijalari – Olimpiya o'yinlari, jahon va qita musobaqalarida doimiy ravishda qo'lga kiritilayotgan medallar – bularning barchasi mana shunday yuksak ishonchni taminlab berdi.