Toshkent tumanida ananaviy "Keles Open" xalqaro turniri o'tkazildi

O'zbekiston Respublikasi sport vazirligi, Toshkent viloyati sport boshqarmasi, Toshkent tumani hokimligi, O'zbekiston karate WKF associaciyasi, Yoshlar ishlari agentligi Toshkent tumani bo'limi hamda Toshkent tumani sport maktabi "Keles Karate" sport klubi bilan hamkorlikda o'tkazilgan mazkur xalqaro turnir yuqori saviyada tashkil etildi.

O'zbekiston Respublikasi Prezidentining 2023 yil 3 noyabrdagi PQ- 356 sonli "Karate (WKF) sport turini yanada rivojlantirish chora-tadbirlari to'g'risida"gi qarori ijrosini taminlash hamda iqtidorli sportchilarni saralash orqali terma jamoalarga munosib nomzodlarni aniqlash maqsadida tashkil etilgan mazkur musobaqada viloyatlar, Toshkent shahri va qo'shni Qirg'iziston, Tojikiston davlatlardan 4 yoshdan 18 yoshgacha va 18 yoshdan katta bo'lgan 1000 nafarga yaqin sportchilar g'oliblik uchun kurash olib borishdi.

Murosasiz va qizg'in bahslarga boy tarzda o'tgan ettinchi ananaviy turnirni Toshkent tumani sport maktabi murabbiyi, "Keles Karate" sport klubi rahbari Dilshod Yusupov, musobaqa bosh kotibi Xurshid SHodibekov, bosh hakam Sanjar Maqsudov hamda bir guruh hakamlar guruhi boshqarib borishdi.

Turnir doirasida tantanali ochilish va g'oliblarni taqdirlash marosimi ham tashkil etildi. Yuqori saviyada o'tkazilgan ushbu tadbirda Toshkent tumani hokimi Sardorbek Ergashev ishtirok etib, kuchli uchlikdan joy olgan yosh karatechilarga diplom, medal va qimmatbaho esdalik sovg'alari topshirdi.

Ikki kun davom etgan murosasiz bellashuvlarning yakuniy natijalirga ko'ra, umumjamoa hisobida faxrli birinchi o'rinni Toshkent viloyati jamoasi qo'lga kiritdi. Ikkinchi o'rinni Toshkent shahri jamoasi egallagan bo'lsa, ikkita uchinchi o'rin Qashqadaryo va Sirdaryo viloyati jamoalariga nasib etdi.

Musobaqada barcha vazn toifasiga ko'ra, g'olib va sovrindorlar diplom, medal va qimmatbaho esdalik sovg'alari bilan taqdirlanishdi.

Ilhom RAHMONOV tayyorladi