Uaylder - Fyuri. Uslublar qarama-qarshiligi (prevyu)

Jang bahsli durang natijasi bilan tugagandi. O'shanda hakamlarning biri Deontey Uaylder foydasiga 115-111, boshqasi esa Tayson Fyuri foydasiga 114-112, uchinchi hakam esa 113-113 hisobidagi durangni qayd etgandi. Jangdan keyin har ikkala bokschi o'zlarining g'alabasiga hech qanday shubha qilmaganini, biroq durang natijasi ham yomon natija emasligini qayd etishgandi. Xolis nuqtayi nazardan shuni aytish kerakki, bu jangda texnik va taktik tomonlama Tayson Fyuri raqibidan ancha yaxshi harakat qilgandi. Biroq, tanganing boshqa tarafi bor deganidek, 12-raundda Fyurining dahshatli nokdaun holatiga tushganidan keyin referining hisobni ochish holati ham anchagina bahsli holat edi.

Deontey Uaylder va Tayson Fyuri qarama-qarshiligining ikkinchi jangi 22.02.2020 kuni Las-Vegasda tashkil etiladi. Bo'lajak jang oldidan Tayson Fyuri Deontey Uaylderni 2 raund ichida nokaut qilmoqchi ekanligini va jang taqdirini hakamlarning hisob-kitobiga bog'liq bo'lib qolishini istamasligini takidlab o'tgan. Deontey Uaylder esa xuddi oxirgi Luis Ortiz bilan jang kabi asosan raqibni kutishi va kerakli vaziyatdan maksimum darajada foydalanish evaziga raqibini nokaut qilmoqchi ekanligini aytib o'tgan. 

Bo'lajak jang oldidan har ikkala bokschi ham MGM Grand Arena'ga etib kelishdi va jang oldi fikrlarini bildirib o'tishdi.

Deontey Uaylder: Birinchi jangimiz ajoyib bo'lgandi, biroq 2-jangimiz undanda qiziqarliroq bo'ladi. SHanba kuni hammaga boksdagi statusimni yana bir bor ko'rsatib o'tmoqchiman. Men Fyurini nokaut qilaman va buni yorqin tarzda amalga oshiraman. Oldinda bundanda katta janglar meni kutmoqda va bu mening davrim boshlanishi xolos. Ushbu jangni intizorlik bilan kutmoqdaman.

Tayson Fyuri: Vegas mening uyim va chempionlarning poytaxtidir. Uaylderni 2 raund ichida nokaut qilaman. O'tgan jangda hakamlar unga durangni sovg'a qilishgandi. Bu safar unday bo'lmaydi. Ko'pchilik Uaylderni nokaut qilishini yoki meni ochko evaziga g'alaba qozonishimni tahmin qilmoqda. Uaylderni tezda nokaut qilib, faoliyatim davomidagi hali mavjud bo'lmagan WBC kamariga ega chiqmoqchiman. Men bu erga shunchaki g'alaba qozonish uchun emas, balki muddatidan oldin g'alaba qozonish uchun tashrif buyurdim.

Revansh jangi yanada ko'proq qiziqishlarga sabab bo'lmoqda. Bu holat jang nufuzini bir tomondan oshiradi. Boshqa tomondan bokschilarning ringdagi uslublari ham bir-biridan tubdan farq qiladi. Bekorga ham “Uslublar janglarni tashkil qiladi” deyishmaydi odatda.

Boks jamoatchiligi Deontey Uaylderning muddatidan oldingi g'alabasini kutmoqda. Fyurini asosiy muammosi - oldingi murabbiyi Ben Devisonni o'zgartirganligida bo'lsa kerak. Yangi murabbiy bilan darhol natijaga erishish mushkul. Qolgan jabhalarda har qanday holatda ham raqibini qiyin ahvolga solib qo'yishi mumkin.

Xullas, har qanday holatda ham revansh jangidan boks muxlislari yutadi.

Eslatib o'tamiz, jang Toshkent vaqti bilan 23 fevral kuni ertalab o'tkaziladi.

Jasurbek Saidmusaev tayyorladi