Uch avlod uchrashuvidan FOTOREPORTAJ

O'zbekiston Milliy olimpiya qo'mitasi tomonidan poytaxtimizning Olmazor tumanidagi 234-sonli umumtalim maktabida o'quvchilar uchun qulay sharoitlar yaratish, aholi, shu jumladan, yoshlar o'rtasida sog'lom turmush tarzini keng targ'ib qilish bo'yicha bir qator tadbirlar amalga oshirilmoqda.

Kecha mazkur maktab yoshlari Rio-2016 Olimpiya o'yinlari bronza medali sovrindori, professional boksda WBA va IBF yo'nalishlari bo'yicha jahon chempioni, “O'zbekiston iftixori” faxriy unvoni sohibi Murodjon Ahmadaliev bilan uchrashish sharafiga muyassar bo'lishdi. Yoshlar bilan o'tkazilgan ushbu uchrashuvda O'zbekiston sport faxriylari kengashi raisi Komiljon Xudoyberganov, sport faxriysi Erkin Karimov ham ishtirok etdi.

Sport faxriylari tomonidan maktabda olinadigan bilimlarning katta hayotda ne chog'lik as qotishi, uning jamiyat hayotidagi tutgan o'rni, shuningdek, yoshlikdan sportga oshno tutingan insonning kelajakda barkamol avlod bo'lib etishishi borasida so'zlab berildi.

Uchrashuv davomida Murodjon Ahmadaliev ham yosh o'quvchilarga o'zining boksga kirib kelishi, sport bilan shug'ullanish uchun yurtimizda barcha sharoitlarning yaratib berilgani, yuksak g'alabalarga erishish uchun faqatgina tinimsiz mehnat qilish kerakligi haqida gapirib berdi.