11 sen 08:56
Yangiliklar

Dzyudo

Uch karra Olimpiya o'yinlari sovrindori Rishod Sobirovni tabriklaymiz!

Bugun O'zbekiston sporti tarixidan joy olgan, Olimpiya o'yinlarining uch karra bronza medali sovrindori, ikki karra jahon chempioni, Osiyo chempioni, "O'zbekiston Respublikasida xizmat ko'rsatgan sportchi", "O'zbekiston iftixori" faxriy unvoni, "El-yurt hurmati" ordeni sohibi Rishod Sobirov o'z tavallud kunini nishonlayapti.

Rishod Sobirov 1986 yil 11 sentyabr kuni Buxoro viloyatining Jondor tumani, Burbog'i qishlog'ida tug'ilgan. Dzyudo bilan 11 yoshida Rustam To'raev qo'l ostida shug'ullanishni boshlagan. Murabbiyi Andrey SHturbabin. U ilk xalqaro miqyosdagi sovrinini 2006 yilda qo'lga kiritgan. O'shanda Rishod Xitoy Taypeyida bo'lib o'tgan yoshlar o'rtasidagi Osiyo chempionatida birinchi o'rinni egallagan.

2008 yilda Pekinda bo'lib o'tgan Olimpiya o'yinlarida -60 kg vazn toifasida bronza medali sohibiga aylangan. 2010 yilda Tokiodagi jahon chempionatida g'oliblikni qo'lga kiritdi. Oradan bir yil o'tib, Parijdagi jahon chempionatida ikki karra jahon chempioniga aylandi. Aynan o'sha yili Xalqaro dzyudo federaciyasi tomonidan dunyoning eng yaxshi dzyudochisi deb topilgan. 2012 yil London, 2016 yilda esa Rio Olimpiadasida yana bronza medallariga ega chiqqan.

Bugungi kunda poytaxtimizning Sergeli tumani Qo'yliq-5 dahasida joylashgan 277-umumtalim maktabi hududida barcha zamon talablariga javob beruvchi Rishod Sobirov nomidagi dzyudo maktabi faoliyat yuritmoqda.