Uimbldon. Karlos Alkaras chempionlik himoyasini davom ettirmoqda

Dunyoning ikkinchi raketkasi Karlos Alkaras musobaqaning to'rtinchi davra ishtirokchisiga aylandi. Ispaniyalik tennischi uchinchi bosqichda ATP reytingida 125-pog'onada borayotgan germaniyalik Yan-Lennard SHtruffni to'rt set natijasiga ko'ra mag'lubiyatga uchratdi - 6/1, 3/6, 6/3, 6/4.

Tennischilarning o'zaro uchrashuvlaridagi hisob Karlos foydasiga yiriklashdi - 4:1. Ikki soatu 27 daqiqa davom etgan bahsda Alkaras 10, SHtruff 13 ta eys zarbasini amalga oshirgan. Qo'shxatolar nemis tennischisida ikki yarim barobar ko'proq bo'ldi - 10 ga 4. Breyklar bo'yicha ustunlik esa tabiiyi, g'olib tennischi tomonida bo'ldi - 5 ga 2. Endi The Championships amaldagi chempioni to'rtinchi davrada rossiyalik Andrey Rublyovga qarshi kortga chiqadi.