Uimbldon turnirining asosiy to'r bahslariga qura tashlandi

London shahrida tennis bo'yicha "Katta Dubulg'a" turkumiga kiruvchi, umumiy mukofot jamg'armasi 86 million dollarni tashkil etuvchi Uimbldon turnirining saralash bahslari yakunlanib, asosiy to'rga yo'llanma olgan barcha 128 tennischi malum bo'ldi.

Biroz avval musobaqaning asosiy to'riga qura tashlandi. O'zbekistonning ikkinchi hamda uchinchi raketkalari Mariya Timofeeva va Polina Kudermetova saralash bosqichida uch nafardan raqibalarini engib, asosiy to'rga chiqqan bo'lsa, birinchi raqamli tennischimiz Kamilla Rahimova reytingdagi o'rni bo'yicha to'g'ridan-to'g'ri asosiy turnirda ishtirok etadi. 

Qura natijasiga ko'ra, Kamilla Rahimova 1/64 finalda ukrainalik Angelina Kalininaga qarshi kortga chiqadigan bo'ldi. Rahimova ayni paytda dunyoning 65, Kalinina esa 70-raketkasi bo'lib turibdi. Ushbu bahs 29 iyun kuni bizning vaqt bilan soat 15:00da boshlanishi belgilangan. 

Ikkinchi raketkamiz Mariya Timofeeva birinchi davrada braziliyalik Beatris Xaddad Mayyaga qarshi bahs olib boradi. Mariya WTA reytingida 92, Beatris 117-o'rindan joy olgan. Ushbu uchrashuv ham 29 iyun kuni soat 15:00da boshlanadi. 

Hozirda WTA reytingida 116-pog'onada borayotgan mamlakatimizning uchinchi raketkasi Polina Kudermetova esa 1/64 finalda dunyoning 42-raketkasi, rossiyalik Lyudmila Samsonova bilan hisob-kitob qiladi.