Ular Olimpiadaga borishadi - Elshod Rasulov!

Bugungi qahramonimiz boks bo'yicha O'zbekiston terma jamoasining eng tajribali vakili Elshod Rasulov.

Elshod Rasulov – 1986 yilning 7 mart kuni Farg'ona viloyatining Qo'qon shahrida dunyoga kelgan. Qiziq holat shundaki, boksdan avval professional tarzda qilichbozlik sport turi bilan shug'ullangan. Lekin vaqt o'tishi bilan boksga bo'lgan mehr ustunlik qildi. Boksdagi ilk murabbiyi Nabijon Boymatov. Poytaxtimizdagi Respublika olimpiya zaxiralari kollejida tahsil olgan. Bu erda u boks sir-asrorlarini O'zbekiston Respublikasida xizmat ko'rsatgan murabbiy Mansur Muhammedovdan olgan. Aynan kollejdagi tahsil jarayonida u avvaliga o'smirlar, keyin yoshlar terma jamoasiga taklif etilgan.

Ilk katta yutug'iga 2004 yili erishgan. O'sha yili u yoshlar o'rtasidagi jahon chempionatida barcha raqiblarini mag'lubiyatga uchratib, oltin medalni qo'lga kiritgan. 2006 yili harbiylar o'rtasida bo'lib o'tgan jahon chempionatida tengsiz bokschi deb topilgan. 2007 yilda Mo'g'ulistonning Ulan-Bator shahri mezbonlik qilgan kattalar o'rtasidagi Osiyo chempionatida ik bor ishtirok etdi. 75 kg vazn toifasida ringga chiqqan Rasulov shoxsupaning eng yuqori pog'onasiga ko'tarildi. Oradan ikki yil o'tib, Xitoyning CHjuxay shahrida o'tkazilgan Osiyo chempionatida Elshod yana bir bor qitaning tengsiz bokschisi ekanligini isbotladi.



Elshod Rasulov ikki karra Osiyo o'yinlari sovrindori hisoblanadi. 2006 yili Qatar poytaxti Doha, 2010 yilda Xitoyning Gunchjou shahrida bo'lib o'tgan Osiyo o'yinlarida oltin medalgi qo'lga kiritgan. CHarm qo'lqop ustamiz uch karra jahon chempionatlari sovrindori bo'lgan. 2009 yili Italiyaning Milan shahrida o'tkazilgan jahon chempionatida kumush medal bilan taqdirlangan. 2011 va 2015 yillarda esa mos ravishda Ozarbayjonning Boku hamda Qatarning Doha shahrida tashkil etilgan jahon chempionatida bronza medalga sazovor bo'lgan.

Elshod London-2012 o'yinlarida O'zbekiston delegaciyasi bayroqdori sifatida

Sportda erishayotgan yutuqlari, Vatanimiz dovrug'ini yanada taratishga qo'shgan hissasi, mamlakatimiz yoshlariga ibrat bo'layotgani uchun Elshod Rasulov “Mehnat shuhrati” ordeni bilan mukofotlangan. SHuningdek, unga “O'zbekiston Respublikasida xizmat ko'rsatgan sportchi” unvoni ham berilgan. Rio-2016 Olimpiadasi yo'llanmasini yaqinda Xitoyda o'tkazilgan turnirda qo'lga kiritgan. Braziliyadagi Olimpiada Elshod Rasulov uchun to'rt yillikning uchinchi eng nufuzli musobaqasi bo'ladi. U 2008 yili Pekin, 2012 yili Londonda bo'lib o'tgan Yozgi olimpiya o'yinlarida ham ishtirok etgan. Ayni kunlarda Rasulov terma jamoamiz tarkibida XXXI yozgi Olimpiya o'yinlariga puxta tayyorgarlik ko'rmoqda.

Kamoliddin Alimov