Ular Olimpiadaga borishadi – SHahram G'iyosov!

Bugungi qahramonimiz boks bo'yicha mamlakatimiz terma jamoasi azosi, xalqaro toifadagi sport ustasi SHahram G'iyosov.

SHahram G'iyosov – 1993 yilning 7 iyul kuni Buxoro shahrida dunyoga kelgan. 10 yoshidan boks bilan shug'ullanishni boshlagan. 2003 yili Buxoro shahridagi Bolalar va o'smirlar sport maktabining boks bo'limiga qabul qilingan. Ilk murabbiyi Olim Muhammedov. Bu mutaxassis ikki karra jahon chempioni Abbos Atoevning murabbiyi ham hisoblanadi. Malumot uchun, Atoev bokschilik faoliyatini yakunlab, bugungi kunda Buxoroda murabbiylik faoliyatini olib boryapti.

SHahram G'iyosov besh yildan beri murabbiy Ravshan Xo'jaev qo'l ostida mashg'ulotlarni o'tkazib kelyapti. O'smirlar va yoshlar ishtirokidagi musobaqalarda aytishga arzigulik yutuqlarni qo'lga kiritgan SHahram 2012 yildan kattalar o'rtasidagi turnirlarda qatnashib kelyapti. Aynan o'sha yili ilk marotaba xalqaro turnirda ishtirok etdi. Simferopol shahrida o'tkazilgan xalqaro musobaqada sahifamiz qahramoni chempionlik shoxsupasiga ko'tarildi. Eng muhimi, u ushbu xalqaro turnirning eng yaxshi bokschisi deb topildi.

SHahram G'iyosov 2015 yildan o'zi uchun yangi vazn toifasiga o'tdi. Bunga qadar 64 kg vazn toifasida ringga ko'tarilib kelgan buxorolik bokschi endi 69 kg vaznda o'z imkoniyatini sinab ko'rishga ahd qildi. Bu esa unga omad keltirdi. Mamlakat chempionatida barcha raqiblarini mag'lubiyatga uchratib, oltin medalni qo'lga kiritdi. Bu bilan u kattalar terma jamoasiga qabul qilindi va eng muhimi murabbiylarning ishonchini oqladi.

SHahram G'iyosov Rio Olimpiadasiga yo'llanmani shu yili Xitoyda o'tkazilgan licenzion Osiyo-Okeaniya chempionatida qo'lga kiritdi. -69 kg vazn toifasida ringga ko'tarilgan bokschimiz barcha raqiblarini mag'lubiyatga uchratishga muvaffaq bo'ldi. U final jangida tailandlik bokschi Saylom Ardini taslim etib, to'rt yillikning eng nufuzli musobaqasiga yo'llanmani naqd qildi.

- Orzuim – 31-Yozgi olimpiya o'yinlari g'olibi bo'lish, - deydi SHahram G'iyosov.

Biz olimpiadada ishtirok etuvchi barcha sportchilarimiz qatori Buxoro boks maktabi tarbiyalanuvchisi SHahram G'iyosovga ham chin manoda zafar yor bo'lishini, Braziliyadan yorug' yuz bilan qaytib kelishini tilaymiz.