Umringga havasim bor, Murabbiy!

Tumandagi bolalar-o'smirlar sport maktabidagi sport turlari orasida belbog'li kurash ham mustahkam o'rin olgan bo'lib, mavjud ikkita guruhda 60 nafardan ziyod  yosh polvonlar mahoratini oshirib keladi. 

Tajribali va jonkuyar murabbiy Toshkentboy Yaxshiboevning guruhida mashg'ulotlarga zo'r berayotgan yigirma nafar sportchi-o'quvchilarning aksariyati chempion va sovrindorlar sanalishadi. 2008 yildan buyon belbog'li kurash bo'yicha yoshlarga ustozlik qilib kelayotgan Toshkentboy ustozi Ravshan Arzimatovdan o'rgangan belbog'li kurash sirlarini bugun o'z shogirdlariga zo'r ishtiyoq bilan o'rgatishi natijasida shogirdlaridan yuz nafardan ortig'i O'zbekiston chempionatlarining oltin va kumush medallarini qo'lga kiritishga muvaffaq bo'lishgan. 

Ahmad Ismoilov, SHerzod Asqarxonov, Akrom Arslonov, SHerali Ortiqxo'jaev, Jahongir Ergashev, Komiljon Nishonboev singari iqtidorli shogirdlaridan ustozning umidi katta. SHogirdlari orasida hatto (Bekzod Begaliev, 2014 yil Rossiyaning Tulyachi shahri) jahon chempionati sovrindori borligi, joriy yil Olmaliq shahrida belbog'li kurash bo'yicha o'tkaziladigan jahon chempionatida shogirdi Komiljon Nishonboevning yo'llanmani naqd qilgani murabbiyning doim izlanishda ekanidan dalolat. BO'SMda murabbiylar kengashining raisi, O'zbekiston milliy belbog'li kurash federaciyasida esa  hakamlar hayati raisi vazifalarini ham sidqidildan bajarib kelayotgan murabbiyni federaciyada barcha birdek hurmat bilan tilga olishadi.

 Respublika miqyosida o'tkazilayotgan har bir musobaqada hakamlarning odilono ish yuritishida doim bosh-qosh. Toshkentboy Yaxshiboevning takidlashicha, ayni paytda besh nafar birinchi toifali, o'ttiz nafar Respublika toifasidagi, olti nafar xalqaro toifadagi hakamlar milliy belbog'li kurash rivoji yo'lida xizmat qilishmoqda. Esini taniganidan beri belbog'li kurashga oshno bo'lgan Yaxshiboening o'zi ham bir paytlar kurash davralarida hayqirib kurash tushgan, ko'p bor g'oliblikni tantana qilgan, raqiblariga qo'llagan usullari belbog'li kurashga bezak bo'lguday yarashganini ko'pchilik muxlislar yaxshi eslashadi. 

Milliy belbog'li kurashni nafaqat mamlakatimizda keng ommalashishi, balki Osiyo va jahon miqyosidagi sport o'yinlarida ham doim belbog'li kurash so'zi yangrashi, shogirdlari o'sha yirik musobaqalarda birinchi bo'lib, YURTni ulug'lashi polvonning maqsad-muddaosi sanaladi.

Toshkentboy Yaxshiboev - 1987 yilning 1 aprelida Parkent tumanida tug'ilgan. Demak bugun uning tug'ilgan kuni! Fursatdan foydalanib, qahramonimizni muborakbod etamiz. Maqsad manzillariga etishishida biz ham tilakdoshmiz.

Ilhom RAHMONOV tayyorladi