"Uzbek Tigers" Termizda jang qiladi

Jamoaning 27 fevral hamda 1 mart kunlari o'tkaziladigan janglari Toshkent shahridagi "Universal" sport majmuasida tashkil qilinadi.

Olamsport.com saytiga malum bo'lishicha, jamoaning keyingi uy uchrashuvi, WSB 4-turi doirasida venesuelalik bokschilarga qarshi o'tkaziladigan jangi Termiz shahrida o'tkaziladi.

O'zbekistonlik mashhur bokschilar nafaqat Toshkentda, balki viloyatlarda ham o'z janglarini o'tkazadi 

Uzbek Tigers jamoasi bokschilarining Termiz shahrida o'tishi rejalashtirilgan WSB tasnifidagi janglari poytaxt Toshkentga ko'chirilgach, ayrim nashrlar bunga o'z munosabatini bildirdi. Mazkur holatni inobatga olgan O'zbekiston boks federaciyasi vaziyatga izoh berishga qaror qildi.

WSB musobaqasining o'tgan mavsumida Uzbek Tigers jamoasi Kubaning mashhur Cuba Domadores klubini Samarqand shahrida qabul qilib, 3:2 hisobida zafar quchgan va o'zbekistonlik charm qo'lqop ustalariga katta quvonch ulashgandi. SHundan keyin jahon darajasida tan olinayotgan bokschilarning qolgan viloyatlarga ham tashrifi rejalashtirildi.

Cuba Domadores jamoasiga qarshi bu safargi jang Termiz shahriga taqdim etilgandi. Biroq yaqindagina Toshkentga tashrif buyurgan AIBA vakillari Milliy olimpiya qo'mitasi rahbariyati bilan uchrashuvda bo'lib, WSB obro'sini ko'tarish masalasida o'zaro hamkorlik qilishni so'radi. Bunda teletranslyaciya masalasi katta o'rin tutishi, shuningdek, ring va uning atrofidagi holatning talab darajasida bo'lishi muhim ahamiyat kasb etishi takidlandi.

Mazkur uchrashuvdan keyin boks federaciyasi MOQ bilan o'zaro maslahatlashib, Cuba Domadores hamda Colombia Heroicos klublariga qarshi ikki kun oralig'ida o'tadigan janglarni Toshkentga ko'chirishga qaror qildi. Bunda birinchi navbatda teletranslyaciya masalasi va uning sifati hisobga olindi. SHuningdek, biz bilan iliq munosabatlarni yo'lga qo'yayotgan AIBA vakillarida yaxshi taassurot qoldirgan va sharoitlari qoniqarli bo'lgan “Universal” sport majmuasi variantida to'xtalindi.

Termiz uchun vada qilingan janglar  esa 6—7 aprel sanalariga rejalashtirilmoqda. SHu kuni WSB guruh bosqichining 4-turi doirasida Venesuela bokschilari Uzbek Tigers klubiga qarshi ringga chiqadi. AIBA taklifi bo'yicha, Termizdagi boks kechasiga jiddiy tayyorgarlik ko'riladi. Teletranslyaciya va tashkilotchilik yuqori saviyada bo'lishi uchun biroz vaqt kerakligi inobatga olinib, federaciya boks kechasining sanasini o'zgartirdi, manzil esa saqlab qolindi.

O'z navbatida MOQ rahbariyati ham nafaqat viloyatlardagi boks muxlislarini xushnud etish, balki O'zbekistonning jahonda tutgan o'rni va mamlakatda sportga bo'layotgan etiborni munosib tarzda namoyish qila olish talabini qo'ygan. Unga ko'ra, Hasanboy Do'stmatov, SHahobiddin Zoirov, Iqbol Xoldorov, Isroil Madrimov, Bahodir Jalolov kabi mashhur bokschilarning viloyatlarda jang o'tkazish ananasi saqlab qolinadi. Biroq hamma narsa puxta reja va yuqori tashkilotchilik asosiga qurilishi kerak bo'ladi.  

Cuba Domadores hamda Colombia Heroicos klublariga qarshi janglar 27 fevral va 1 mart sanalarida o'tadi.  MOQ taklifi bilan boks oqshomiga Toshkent shahridagi imkoniyati cheklangan shaxslar uchun ixtisoslashtirilgan respublika kasb-hunar kolleji, 100-sonli polimilit tayanch harakati buzilgan bolalar internati hamda 23-sonli mehribonlik uyi tarbiyalanuvchilari tashrif buyuradi. Ularni “Universal” sport saroyiga olib kelish uchun maxsus avtobuslar yuboriladi.

O'z navbatida keyinchalik ham viloyatlarda o'tadigan janglarni tomosha qilish uchun yuqoridagi kabi imkoniyati cheklangan bolalarni o'z bag'riga olgan maskanlarda sharoit bo'ladi. Uzbek Tigers jamoasi guruh bosqichini muvaffaqiyatli bosib o'tib, chorak finalga yo'l olsa, Samarqand va Termizdan keyin, qolgan mashhur shaharlar ham boks kechalariga mezbonlik qilish huquqini qo'lga kiritadi.