"Uzbek Tigers" yangi mavsumda ishtirok etadimi? MOQ rahbari masalaga oydinlik kiritdi

OAVda O'zbekiston boks federaciyasi jamoani moliyalashtirishni to'xtatishga qaror qilgani haqida malumotlar paydo bo'ldi. Kun.uz muxbiri ayni masalaga aniqlik kiritish uchun Milliy olimpiya qo'mitasi prezidenti Umid Ahmadjonovga bir nechta savollar bilan murojaat qildi.

– Oxirgi uch mavsumda Butunjahon boks seriyasida O'zbekiston sharafini himoya qilgan «Uzbek Tigers» jamoasi o'tgan haftada tarqatib yuborilgani haqida xabarlar tarqaldi. Bu malumot qanchalik to'g'ri?

– Avvalo, shuni takidlashni istardimki, Butunjahon boks seriyasi (WSB) musobaqasining o'zbek boksi taraqqiyotida tutgan o'rni juda muhimdir. Malumki, ushbu turnir orqali yangi nomlar kashf etiladi, kuchli bokschilar saralanadi. SHuningdek, mazkur musobaqa bokschilarimiz uchun Osiyo va jahon chempionatlari, Olimpiya va Osiyo o'yinlariga munosib tayyorgarlik ko'rish vazifasini bajarishi bilan ham ahamiyatlidir. CHunki turnirda Kuba, Rossiya, Qozog'iston kabi boks olamidagi etakchi mamlakatlarning charm qo'lqop ustalari ham ishtirok etadilar va bokschilarimiz ularga qarshi janglar orqali o'z mahoratlarini toblab boradilar.

Bevosita savolingizga kelsak, «Uzbek Tigers» musobaqaning yangi mavsumida ham bahslarda qatnashadi. O'zbek boksi muxlislariga bayram kayfiyatini ulashish maqsadida yurtimiz mezbonlik qiladigan janglar respublikamizning eng yirik va muhtasham arenalarida tashkil etiladi. Jumladan, kelasi oyda foydalanishga topshiriladigan «Humo» ko'p tarmoqli arenasi, shuningdek, «Milliy» stadionida ham minglab muxlislar bokschilarimizning mahoratlariga bevosita guvoh bo'lishlari mumkin.

O'z navbatida, Milliy olimpiya qo'mitasi «O'zbek yo'lbarslari»ning samarali faoliyat olib borishi uchun mamlakat boks federaciyasiga kerakli yordamni ko'rsatishga va har tomonlama qo'llab-quvvatlashga tayyor. Jamoaga barcha shart-sharoitlar yaratib beriladi.

– WSB`ning yangi mavsumida qanday o'zgarishlar kutilmoqda? Turnir fevral oyida start olardi, lekin 9-mavsum haligacha boshlanmagani sabab go'yo AIBA bu turnirni to'xtatishi haqida mish-mishlar tarqalmoqda.

– AIBA bu yildan boshlab WSB turniri formatiga o'zgartirish kiritishni maqsad qilgan. Xabaringiz bor, Tokio-2020 Olimpiya o'yinlarida erkaklar o'rtasidagi bahslarda vazn toifalari soni 10tadan 8taga tushirildi va shuning hisobiga ayollar vazn toifasi 5taga oshirildi. SHundan kelib chiqqan holda Butunjahon boks seriyasida ham vazn toifalari 8taga tushirilib, ikkita ligaga ajratilmoqda. Yani engil (52, 57, 63, 69 kg) hamda og'ir (75, 81, 91, 91+ kg) vaznlar. Musobaqada ishtirok etuvchi mamlakat har ikkila ligaga ham o'z jamoasini qo'yishi mumkin.

Bu safargi musobaqa Tokio–2020 Olimpiya o'yinlariga licenziya berishi bois, AIBA jamoaviy bellashuvlarni 2019 yilning oktyabridan boshlab, 2020 yilning fevraliga qadar o'tkazishni rejalashtirmoqda. 2020 yilning 29 may – 6 iyun kunlari bo'lib o'tadigan musobaqada esa WSB licenzion turniri va yakka tartibdagi finallar bo'lib o'tishi kerak. Mazkur musobaqa orqali Olimpiadada ishtirok etuvchi so'nggi 16 yo'llanma egasi aniqlanadi. SHunday ekan, AIBA bu musobaqani to'xtatish emas, aksincha uni yanada rivojlantirish choralari haqida o'ylayapti.

– 2019 yilda o'zbekistonlik bokschilar oldida turgan eng muhim musobaqalar qaysilar? Yulduzli tarkib azolarining aksariyati professional boksga o'tgani natijalarga qanchalik tasir etishi mumkin?

– Joriy yilda bokschilarimiz biryo'la ikkita yirik va nufuzli musobaqada ishtirok etishadi. Aprel oyida Tailand poytaxti Bangkok shahrida kattalar o'rtasida Osiyo chempionati bo'lib o'tsa, Rossiyaning Ekaterinburg shahri sentyabr oyida jahon chempionatiga mezbonlik qiladi. Hozirda terma jamoamiz azolari uzluksiz o'quv-mashg'ulot yig'inlari orqali mazkur muhim musobaqalarga munosib tayyorgarlik ko'rishmoqda.

Ekaterinburgdagi jahon chempionatida Tokio–2020 Olimpiya o'yinlari uchun dastlabki licenziyalar o'ynaladi. AIBA jahon chempionatida licenziya ola bilmagan davlatlar uchun keyinchalik mintaviy licenzion turnirlar ham tashkil etishni rejalashtirgan. Osiyo va Okeaniya mintaqasi uchun ana shunday licenzion turnir esa kelasi yili bahorda bo'lib o'tadi.

SHuni alohida takidlashni xohlardimki, O'zbekiston boks bo'yicha jahonning eng qudratli derjavalaridan hisoblanadi. Rio-2016 Olimpiadasida o'zbekistonlik bokschilar umujamoa hisobida birinchi o'rinni egallashgani ham fikrimizni isbotlab turibdi. SHunday ekan, Tokio Olimpiadasida ham o'zbek charm qo'lqop ustalari eng yuqori o'rinlar uchun kurash olib borishlariga ishonchim komil.

Savolingizni ikkinchi qismiga kelsak, bazi sportchilarimizning professional boksga o'tib ketgani terma jamoamiz tarkibini kuchsizlantiradi, degan fikrdan yiroqman. CHunki o'zbek boksida juda kuchli raqobat yuzaga kelgan. Har bir iqtidorli va kuchli bokschiga zaxira variantlari mavjud. Lekin shunga qaramay biz Osiyo chempionatining bazi vazn toifalariga prof boksda faoliyat olib borayotgan yurtdoshlarimizni ham jalb qilishimiz mumkin. Masalan -75 kg va +91 kg vazn toifalarida Isroil Madrimov va Bahodir Jalolovlarni Bangkokdagi musobaqada terma jamoamiz tarkibida ko'rishingiz mumkin.

Bu, birinchidan, terma jamoamiz tarkibida raqobatni yanada kuchaytirsa, ikkinchidan murabbiylar uchun licenzion musobaqa sanalgan jahon chempionati oldidan professional ringda shug'ullanayotgan bokschilarimizning jismoniy va funkcional holati, ruhiy tayyorgarligini yana bir bor sinovdan o'tkazib olish imkonini beradi.

Biz Tokio–2020 Olimpiya o'yinlarida professional boksda faoliyat olib borayotgan hamyurtlarimiz xizmatidan ham foydalana olamiz; albatta, agar ularning tayyorgarligi talabga javob bersa.

Malumot uchun, "Uzbek Tigers" ushbu musobaqada ilk marotaba 2016 yilda (VI mavsum) ishtirok etgan. O'shanda jamoa guruh bosqichida Puerto-Riko, Ozarbayjon va Qozog'iston jamoalaridan ustun kelgan. CHorak finalda Rossiya vakillari mag'lub etilgan. Yarim finalda esa kubalik charm qo'lqop ustalariga imkoniyat boy berilib, bokschilarimiz 3-o'rin bilan cheklanishgan.

2017 yilda (VII mavsum) jamoa Xitoy, Qozog'iston va Rossiya sharafini himoya qiluvchi bokschilarga qarshi bahs o'tkazib, guruhda ikkinchi o'rinni egallagan. CHorak finalda esa yana Kuba bokschilariga mag'lub bo'lgan.

2018 yilgi (VIII mavsum) bahslarda esa guruh bosqichini Amerika guruhida boshlagan bokschilarimiz Kuba, Venesuela va Kolumbiya vakillariga qarshi ringga chiqib, ikkinchi o'rinni egallashgan. Biroq, tashkilotchilar qoidalarga o'zgartirish kiritib, chorak final bahslarini bekor qilishgan. SHu sababli "Uzbek Tigers" ishtirokini erta yakunlagandi.