Velotrek bo'yicha Respublika ochiq turniri yakunlandi

Uch kun davom etgan mazkur musobaqa qizg'in bahslarga boy bo'ldi. Birinchi kungi bahslarda o'z yo'nalishlari bo'yicha erkaklar o'rtasida Begzod Rahimboev hamda Dilmurod Siddiqov birinchilikni qo'lga kiritgan bo'lsa, ayollar o'rtasida SHahnoza Abdullaeva va Diana Adelshenova peshqadamlik qildi.

O'smirlar o'rtasida esa Kamron Mirzarahimov raqiblaridan katta farq bilan o'zib ketgan bo'lsa, qizlar orasida Anastasiya Otchenko 1-o'rinni egalladi.

Ikkinchi kungi bahslarda har ikkala yo'nalish bo'yicha erkaklar o'rtasida Dmitriy Bocharov o'z ustunligini namoyish etgan bo'lsa, ayollardan Renata Baymetova birinchilikni qo'ldan bermadi.

O'smirlar orasida kechgan murosasiz bahslar so'ngida Vladislav Troman, qizlardan esa Sofiya Karimova marraga birinchi bo'lib etib kelishdi.

Kecha o'tkazilgan uchinchi kungi bahslarda marrani birinchi bo'lib zabt etish erkaklar o'rtasida taniqli sportchimiz Murodjon Xolmurotovga, ayollardan esa Renata Baymetovaga nasib etdi. O'smirlar orasida omad Kamron Mirzarahimovga kulib boqqan bo'lsa, qizlar bahsida yana Sofiya Karimova o'z ustunligini isbotladi.