Velotrek: Respublika ochiq turniri yangi istedodlarni kashf etdi

Uch kun davom etgan musobaqada jami 117 nafar velosportchi g'oliblik uchun o'zaro bahs olib borishdi. Birinchi kun natijalariga ko'ra o'z yo'nalishlarida yoshlar o'rtasida Dmitriy Sirko va Arseniy Pokosenkolar g'oliblikni qo'lga kiritishgan bo'lsa, qizlar o'rtasida Sofiya Karimova ikki yo'nalish bo'yicha ham tengsiz, deb topildi. O'spirinlar o'rtasida belgilangan masofani birinchi bo'lib Ruslan Nafikov bosib o'tdi. Kichik yoshli velosportchi qizlar o'rtasida o'tgan bahslarda Asal Rizaeva g'olib bo'ldi.

Musobaqaning ikkinchi kuni ham qizg'in va shiddatli vaziyatlarga boy bo'ldi. Dmitriy Sirko bu safar ham har ikki yo'nalishda g'oliblikni qo'ldan bermadi. Qizlar o'rtasida chempionlik o'z yo'nalishlarida Anna Kulikova hamda Margarita Misyurinalarga nasib etdi. O'smirlar va qizlar o'rtasida Ruslan Nafikov va Asal Rizaeva 2-kungi bahslarda ham peshqadam bo'lishdi.

Uchinchi kungi bahslarda ham Dmitriy Sirko o'zining ushbu sport turida peshqadam ekanligini isbotladi. Qizlar o'rtasida kechgan bahslarda Sofiya Karimova 1-o'rinni egalladi. Kichik yosh toifasidagi musobaqalarda ham yana bir bora Ruslan Nafikov hamda Asal Rizaeva g'oliblikni qo'lga kiritib, barcha yo'nalishlar bo'yicha mutlaq g'alabani qo'lga kiritdi.