Vladimir Safarov “Jismoniy tarbiya va sport alochisi” nishoni bilan taqdirlandi

O'zbekiston Respublikasi jismoniy tarbiya va sport vazirining buyrug'iga binoan faxriy jurnalist va yozuvchi “Jismoniy tarbiya va sport alochisi” nishoni bilan taqdirlandi. Mukofotni Jismoniy tarbiya va sport vazirining birinchi o'rinbosari Oybek Kasimov topshirdi.

Vladimir Safarov O'zbekiston futboli va "Paxtakor"ga oid barcha muhim voqealarni qayd etib boruvchi inson sifatida jamoatchilikka yaxshi tanish. U jaz musiqasi shaydosi va ijrochisi, jurnalist, yozuvchi va o'zbek futboli tarixchisi sifatida ko'pchilikning qalbidan joy olgan.

U tashkil etgan "Arcax" jaz guruhi O'zbekistondagi arman milliy madaniy markazi nomidan xalqaro festivallarda faol qatnashib keladi. Turli mamlakatlardagi ommaviy axborot vositalarida Vladimir Safarovning uch mingdan ortiq maqolalari chop etilgan. Otaxon jurnalist O'zbekiston futboli tarixi va statistikasiga oid o'ttizdan ortiq kitoblar muallifi hisoblanadi. SHuningdek, bir qator mashhur futbolchilar va futbol klublari haqida kitoblar yozgan.

Vladimir Ashotovich o'zi to'plagan statistik malumotlarni "Rossiya futbolining yuz yilligi" va "Futbol sayyorasi" kitoblari yaratilish uchun taqdim etgan. Estoniyada chop etilgan "Mustaqil davlatlar futboli", Ukraina-Rossiyada omma etiboriga havola qilingan "Statistika to'plami" kitoblari uchun O'zbekiston futboli statistikalarini yig'ib bergan. 2000 yil O'FF tomonidan yilning eng yaxshi jurnalisti sifatida tan olingan. "O'zbek futboli enciklopediyasi" ham aynan Safarov tomonidan yaratilganini takidlab o'tamiz.

Vladimir Ashotovichning kitoblari orasida eng mashhurlari quyidagilardir:

“Paxtakor. Unutilmas uchrashuvlar...” (1990), “Paxtakor. 40 yilga cho'zilgan o'yin” (1995), “Aka-uka Anlar futboli” (2002), “Xotira qanotlari. "Paxtakor-79" aviahalokati hujjatli xronikasi” (2004), “O'zbek futboli afsonasi: Birodar Abduraimov” (2009), “Hamid Rahmatullaev – o'zbek Pelesi” (2011), “Bahodir Ibrohimov: Futbolga baxshida umr” (2013), “Igor SHkvirin. Hujumchining sarguzashtlari” (2014).

Vladimir Ashotovich hozir ham faol ijod qilishda davom etmoqda. Biz Safarov qalamiga mansub yangi va yangi asarlarni orziqib kutib qolamiz.