Xorazm viloyatida sportga etibor qay darajada?

Ishchi guruh azolari Xorazm viloyatining Yangiariq, Xonqa, Bog'ot, Hazorasp hamda Tuproqqala tumanlarida bo'lib, ushbu hududlarda jismoniy tarbiya va sportga berilayotgan etibor, mavjud sport muassasalarining holati hamda joylarda mahalla yoshlari o'rtasidagi «Futbolimiz kelajagi», «Mahallada futbol», «CHarm to'p», shuningdek korxona-tashkilotlarning ishchi-xodimlar o'rtasida tashkil etilayotgan «Hokim kubogi» hamda «Rahbar kubogi» ommaviy futbol musobaqalari qanday o'tkazilayotgani bilan yaqindan tanishdi.

Yangiariq tumanining umumiy aholisi soni 115 ming kishini tashkil etib, ularning salmoqli qismini sport bilan faol shug'ullanishi mumkin bo'lgan yoshlar tashkil etadi.

Tuman bolalar-o'smirlar sport maktabida ayni paytda sportning 22ta turi bo'yicha to'garaklar faoliyati yo'lga qo'yilgan. Ularda 25 nafar trener-o'qituvchilar yoshlarga saboq berib kelmoqda. Boshlang'ich tayyorlov guruhlari 68tani, o'quv-mashg'ulot guruhlari esa 9tani tashkil etadi. Sport bilan muntazam shug'ullanuvchi yoshlar soni 1 046 nafar bo'lib, ularning 354 nafari qizlardir.

Tumanda «Futbolimiz kelajagi» hamda «Mahallada futbol» musobaqalari yuqori saviyada tashkil etildi. Biroq, tuman yoshlarining hududiy saralash bosqichida omadi chopmadi. Ayni paytda «CHarm to'p» musobaqasining tuman bosqichi yakunlanib, g'olib chiqqan jamoa hududiy saralash bosqichiga qizg'in tayyorgarlik ko'rmoqda. SHuningdek, sentyabr oyining ikkinchi yarmida «Hokim kubogi» hamda «Rahbar kubogi» musobaqalarini ham o'tkazish ko'zda tutilgan.

Bog'ot tumani bolalar-o'smirlar sport maktabida tashkil etilgan ishlar ham ancha yaxshi, faqat stadion maysasi yaxshilanishi va maydonning o'lchami xalqaro standartlar darajasida kengaytirilishi kerak. SHunda bu erdan mahoratli yosh futbolchilar etishib chiqishi imkoniyati ortadi. Darvoqe, «Futbolimiz kelajagi» musobaqasida Bog'ot tumani «Yosh o'smir» mahallasi yoshlari viloyatda faxrli 3-o'rinni qo'lga kiritganligini ham takidlashimiz kerak.

Hazorasp tumanidagi vaziyat ham qoniqarli darajada. Ammo Xonqa tumani BO'SM hamda Tuproqqala tumanidagi suv havzasining holati yaxshi emas. Xolbuki, bir vaqtlar Xonqa tumanining futbol jamoasi sobiq Ittifoq chempionati 2-ligasida qatnashgan, bu erda qanchadan-qancha mashhur futbol yulduzlari to'p tepgan. Jumladan, O'zbekiston milliy terma jamoasi bilan XIV yozgi Osiyo o'yinlari g'olibligini qo'lga kiritgan Ulug'bek Ro'zimov ham aynan Xonqa tumanidan etishib chiqqan va 1982 yil «CHarm to'p» musobaqasida g'oliblikni qo'lga kiritgan edi.

Hozirgi holatni mahalliy mutasaddilar har ikki inshoot kapital tamirga tushgani bilan izohlashdi. Tamirlash ishlari 2021 yilga mo'ljallangan ekan. Unga ham ko'p vaqt qolmadi. 

Umid qilamizki, shundan keyin mazkur hududlardagi holat ijobiy tomonga o'zgaradi.