Xorazmda regbi bo'yicha seminar o'tkazildi FOTOGALEREYA

Ushbu sport turini aholining keng qatlamlari orasida targ'ib qilish va ommaviyligini yanada oshirish, buning barobarida tayyorgarlik jarayonlarini talab darajasida o'tkazilishini taminlash, mahoratli sportchilarni tayyorlash va malakasini oshirish  uchun etarli shart-sharoit va imkoniyatlar yaratish yo'lida islohotlar olib borilmoqda. 

Albatta, bu borada O'zbekiston Respublikasi Prezidentining “O'zbekiston Respublikasida regbi sport turini rivojlantirish chora-tadbirlari to'g'risida”gi qarori dasturilamal vazifasini o'tayotir. Joylarda ushbu qarorni hayotga tadbiq etish maqsadida ibratli ishlar amalga oshirilyapti. 

Xususan, joriy yilning 9-15 dekabr kunlari Urganch shahridagi “Yoshlik” sport majmuasida o'quv-amaliy seminar bo'lib o'tdi. 

SHimoli-G'arbiy harbiy okrugi, Xorazm viloyati hokimligi, shuningdek, viloyat jismoniy tarbiya va sport boshqarmasi, O'zbekiston regbi federaciyasi va uning viloyat hududiy bo'limi hamda boshqa tashkilotlar hamkorligida uyushtirilgan seminarda 400 nafardan ziyod regbichi va murabbiylar nazariy va amaliy bilimlarini boyitishdi, tajriba va malakalarini yuksaltirishdi.

Mashg'ulotlarni O'zbekiston regbi federaciyasi ijrochi direktori Rustam Nabiev olib bordi. Qoraqalpog'istonlik mutaxassislar - Anton Mixaylov, Ernazar Maxambetkarimov, Jetker Bazarov va Abdusaid Kiyasovlar assistentlik qilishdi.

Uyushtirilgan o'quv-mashg'ulot jarayonlari xorazmlik regbichilar uchun foydadan holi bo'lmadi. Binobarin, seminar yakunida tashkil etilgan “Regbi-7” va “Regbi-15” bo'yicha o'yinlar Xorazm viloyati terma jamoasiga nomzodlarni saralab olish imkonini ham berdi. 

Ikrom XUDOYBERGANOV, Urganch shahridan