Yangicha qiyofadagi sport maktabida mashg'ulotlar avjida

Toshkent viloyati jismoniy tarbiya va sport boshqarmasi tasarrufidagi Yangiyo'l shahar bolalar-o'smirlar sport maktabida ham sportchi-o'quvchilar mashg'ulotlarda emin-erkin ishtirok etishlari uchun imkoniyatlar muhayyo etilgan. 

Bugun mazkur sport maktabida basketbol, taekvondo (VTF), dzyudo, boks, regbi, badiiy gimnastika, erkin kurash, universal jang, kikboksing, armrestling, qo'l jangi sport turlari bo'yicha 636 nafar o'quvchilar 14 nafar murabbiy qo'l ostida mahoratlarini oshirib borishmoqda.  

BO'SM tarbiyalanuvchilarining mashug'lotlarga zo'r berayotgani bois, joriy yilda basketboldan ikki nafar, armrestlingdan besh nafar, universal jang sport turidan yigirma olti nafar, kikboksingdan uch nafar, regbi sport turidan sakkiz nafar o'quvchilar O'zbekiston chempionati va kubogi bellashuvlarida g'olib va sovrindorlar qatoridan joy olishga muvaffaq bo'lishgan. 

Ayniqsa, yangiyo'llik yoshlarning regbi sport turiga bo'lgan ishtiyoqi yuqoriligi bois, ushbu sport turini rivojlantirish uchun yanayam keng ko'lamli ishlar boshlab yuborilgan. Yanayam etiborlisi, regbi bo'yicha ayollar milliy terma jamoasining 13 nafarini BO'SM o'quvchilari tashkil etadi.

Ota-onalar, sportchi-o'quvchilarning takidlashicha, BO'SM direktori Davron  Qodirov rahbarligida yaqin qisqa vaqt mobaynida sport maktabida sharoitlar yanayam yaxshilangan. Boisi, ochiq turdagi suzish havzasi qayta tamirlangan, havzadan chiqayotgan suv stadionga yo'naltirilib, sug'orish ishlari yo'lga qo'yilgan. 

Isitish tizimida tamirlash ishlari olib borilgan, mashg'ulot zallarida ham tamirlash ishlari bajarilib, qulayliklar yaratilgan. O'zbekiston Respublikasi Jismoniy tarbiya va sport vazirligi hamda Yangiyo'l shahar hokimligining manzilli dasturlariga muvofiq, BO'SM stadionida, yugurish yo'lakchalarida  ham rekonstrukciya ishlari nihoyasiga etkazilmoqda.

Davlatimiz rahbari tomonidan ilgari surilgan beshta muhim tashabbus ijorisini taminlash maqsadida umumiy o'rta talim maktablari bilan hamkorlikda sportga bo'lgan ommaviylikni oshirish uchun tadbirlar tashkil etilayotgani, nomdor sportchilar ishtirokida master-klasslar uyushtirilayotgani, sport turlari bo'yicha turli bellashuvlar o'tkazilayotgani ham bor gap.

Bir so'z bilan aytganda, bolajonlarning sevimli maskanida mashg'ulotlar avji pallasida, yaratilayotgan qulay sharoitlardan maqsadli foydalanayotgan o'g'il-qizlar irodalarini mustahkamlab, chempionlik sari odimlamoqda.  

Ilhom RAHMONOV tayyorladi