Yarim asrlik umr muborak, Oksana CHusovitina!

O'zbek va jahon gimnastikasi yulduzi Barselona-1992 Olimpiadasining oltin, Pekin-2008 Olimpiadasining kumush medali sohibi, jahon chempionatlarining 3 ta oltin, 4 martadan kumush va bronza medallari egasi, Osiyo o'yinlarining 2 ta oltin, 4 ta kumush va 2 ta bronza medali sovrindori, 8 karra Olimpiya o'yinlari ishtirokchisi, “O'zbekiston iftixori”, “O'zbekiston Respublikasida xizmat ko'rsatgan sportchi”, “O'zbekiston Respublikasida xizmat ko'rsatgan sport ustozi” faxriy unvonlari, "Do'stlik", “Mehnat shuhrati” va “El-yurt hurmati” ordenlari sohibi hisoblanadi.

Oksana CHusovitina 1975 yil Buxoroda tug'ilgan. U dunyoda sakkizta Olimpiadada qatnashgan yagona gimnastikachi hisoblanadi. U 1992 yilgi Barselona Olimpiadasida oltin, 2008 yilgi Pekin Olimpiadasida kumush medalni qo'lga kiritgan. Oltin medalni u Sobiq Ittifoq mamlakatlari sportchilaridan tuzilgan jamoa tarkibida, kumush medalni esa Germaniya terma jamoasi uchun olgan. 

1992 yilgi vaziyat o'z-o'zidan tushunarli. 2008 yilgi holat bo'yicha esa bir qancha tushunmovchiliklar, turli variantlar yangraydi.

Germaniyaga ketish

"Opa" 2007 yildan Germaniya terma jamoasi sharafini himoya qila boshlaydi. Bunga oilaviy masalalar sabab bo'lgan. CHusovitinaning farzandi Alisherda aniqlangan oqqon kasalligi uni Germaniyaga borishga majbur qiladi. Moliyaviy tomonlama qulay taklif olgan Oksana Germaniya sharafini himoya qiladi va Olimpiadada kumush medalga ega chiqadi. Aynan ushbu pullar evaziga uning farzandi kasallikdan halos bo'ladi. 2012 yilgi Olimpiadada ham Germaniya terma jamoasi sharafini himoya qilgan Oksana 2013 yildan boshlab yana O'zbekistonga qaytadi. CHusovitinaning qaytishida o'sha paytda Milliy Olimpiya qo'mitasi rahbari bo'lgan rahmatli Mirabror Usmonov, shuningdek Bosh kotib Oybek Kasimovlarning ulkan hissasi borligini alohida qayd etish lozim.  

Orzu

CHusovitina O'zbekistonga qaytgach, yana xalqaro musobaqalarda yurtimiz sharafini himoya qila boshlaydi. Jahon kubogi bosqichlari, Osiyo chempionatlari, Osiyo o'yinlaridagi medallar va boshqa xalqaro turnirlar... U O'zbekiston uchun Olimpiada medalini olishni eng katta orzularidan biri sifatida bir necha bor takrorlab kelgan. Afsuslar bo'lsinki, Rioda ham, Tokioda ham qahramonimizga medal olish nasib etmadi. 

Tokiodagi "bayroqdorlik" va xayrlashuv

Tokioda yodingizda bo'lsa, avvaliga uni bayroqdor sifatida elon qilib, keyinchalik bu sharafli vazifani olib qo'yishgandi. "Nima uchun bayroqdorlikni olib qo'yishganini menga tushuntirishmadi. SHunchaki meni bormasligimni aytishdi, tamom. Motivaciyani o'ldirishdi. Bunday qilish mumkin emas. SHunchaki tushuntirsa bo'ladiku, barchamiz odammiz, tushunamiz", degandi CHusovitina o'shanda. Bunday "chopilish" o'z navbatida jahon OAVida ham katta shov-shuvga sabab bo'lgandi. 

Sportga qaytish

2021 yilning oktyabr oyida CHusovitina yana katta sportga qaytishini va 2022 yilgi (keyinchalik 2023 yilga qoldirilgan) Osiyo o'yinlariga tayyorgarlik ko'rishini elon qildi. Oradan biroz muddat o'tib esa Parij Olimpiadasida ham ishtirok etish maqsadi borligi haqida malum qildi. 

2023 yili Xanchjouda o'tkazilgan 19-Osiyo o'yinlarida CHusovitina o'zining sevimli yo'nalishi - tayanib sakrash bahslarida qatnashdi va 4-o'rinni oldi.

Toshkentdagi licenzion turnirda Oksananing chiqishini sport ixlosmandlari kutishgandi. Ammo jarohat bunga yo'l qo'ymadi. Afsonaning ertagi 49 yoshda shu tarzda yakunlandi. 

Natijalar

Olimpiya o'yinlari:

Barselona-1992: oltin

Pekin-2008: kumush

Jahon chempionatlari:

Indianapolis-1991: oltin

Indianapolis-1991: oltin

Indianapolis-1991: kumush

Parij-1992: bronza

Birmingem-1993: bronza

Gent-2001: kumush

Debrecen-2002: bronza

Anahaym-2003: oltin

Melburn-2005: kumush

Orxus-2006: bronza

Tokio-2011: kumush

Osiyo o'yinlari:

Xirosima-1994: bronza

Xirosima-1994: bronza

Pusan-2002: oltin

Pusan-2002: kumush

Pusan-2002: kumush

Pusan-2002: oltin

Inchon-2014: kumush

Jakarta-2018: kumush

Evropa chempionati:

Amsterdam-2007: kumush

Klermon-Ferran-2008: oltin

Berlin-2011: kumush

Bryussel-2012: kumush.

Aziz To'xtamurodov tayyorladi