24 fev 22:47
Yangiliklar

Kurash

Yashnobodda bel olish va uch kurash bo'yicha O'zbekiston chempionati boshlandi + FOTO

Bugun poytaxtimizning Yashnobod tumanidagi 1-sonli bolalar-o'smirlar sport maktabida bel olish va uch kurash bo'yicha 2004-2005 tug'ilgan o'g'il bolalar va qizlar hamda kattalar o'rtasida O'zbekiston chempionati boshlandi.

O'zbekiston Respublikasi Jismoniy tarbiya va sport vazirligi hamda O'zbekiston Bel olish va uch kurash associaciyasining yillik-taqvim rejasidan o'rin olgan mamlakat chempionatida Qoraqalpog'iston Respublikasi, Toshkent shahri va barcha viloyatlardan 500 nafardan ziyod sportchilar g'oliblik uchun kurash tushishmoqda.

BO'SMning bayramona bezatilgan sport zalida dastlab, musobaqaning tantanali ochilish marosimi tashkil etildi.

Marosimda so'z olgan O'zbekiston bel olish va uch kurash associaciyasi bosh kotibi Nosir Azizov sportchilarni qutlab, chempionat ishtirokchilariga muvaffaqiyat tiladi. Ochilish marosimi yakuniga etgach, bellashuvlarga start berildi.

Musobaqa reglamentiga muvofiq, bugun 2004-2005 yillarda tug'ilgan o'g'il-qizlar va kattalar bel olish kurashi bo'yicha o'z vazn toifalarida bellashishdi.